په‌رله‌مانتارێك: نه‌وت راده‌ستنه‌كرێت بودجه‌ ته‌نها له‌سه‌ر كاغه‌ز ده‌بێت

.

ئه‌ندامێكی ئه‌نجومه‌نی نوێنه‌رانی عیراق راگه‌یاند، لیژنه‌ی دارایی له‌داڕشتنه‌وه‌ی پرۆژه‌ی یاسای بودجه‌دا گه‌یشتوونه‌ته‌ مادده‌ی 16 و ئه‌و ماددانه‌ په‌یوه‌ندی به‌پشكی كورده‌وه‌ هه‌یه‌ تێپه‌ڕێنراوه‌.

به‌ختیار شاوه‌یس ئه‌ندامی ئه‌نجومه‌نی نوێنه‌رانی عیراق له‌فراكسیۆنی یه‌كێتی به‌ PUKmedia ی راگه‌یاند: كۆبوونه‌وه‌ی لیژنه‌كانی په‌رله‌مان به‌تایبه‌ت لیژنه‌ی دارایی له‌باره‌ی داڕشتنه‌وه‌ی بودجه‌ی گشتی عیراق بۆ ساڵی 2021 گه‌یشتونه‌ته‌ مادده‌ی 16 و مادده‌كانی كه‌ په‌یوه‌ندی به‌كورده‌وه‌ هه‌یه‌ كه‌ مادده‌كانی 10 و 11 یه‌ تێپه‌ڕێنراوه‌.

وتیشی: له‌لایه‌ن لیژنه‌ی داراییه‌وه‌ بۆ مادده‌كانی په‌یوه‌ست به‌كورده‌وه‌ دوو پێشنیار ده‌نگی له‌سه‌ر دراوه‌و له‌ڕۆژی ده‌نگدانی بودجه‌دا ئه‌و دوو پێشنیاره‌ ده‌هێنرێته‌ ناو هۆڵی په‌رله‌مان، كه‌ یه‌كه‌میان خۆی له‌وه‌دا ده‌بینێته‌وه‌ كه‌ ده‌قی پرۆژه‌كه‌ وه‌ك خۆی بهێنرێته‌ په‌رله‌مان تا ده‌نگی له‌سه‌ر بدرێت و هه‌روه‌ها دووه‌میشیان ئه‌وه‌یه‌ له‌بری راده‌ستكردنی بڕی 250 هه‌زار به‌رمیل نه‌وتی رۆژانه‌، ده‌بێت هه‌رێم ته‌واوی نه‌وت و داهاتی نا نه‌وتیه‌كان ته‌سلیم بكات.

ئه‌وه‌شی خسته‌ڕوو: ئه‌وه‌ی من ئاگاداربم هه‌ر حه‌وت كوتله‌ شیعه‌كان و زۆرینه‌ی سونه‌كانیش بڕیاریان داوه‌ له‌گه‌ڵ پێشنیاری دووه‌مدا بن، واتا ده‌بێت هه‌رێم ته‌واوی نه‌وت و داهاتی نا نه‌وتیه‌كان ته‌سلیم بكات، به‌ڵام خاڵی ئیجابی بۆ كورد ئه‌وه‌یه‌ كه‌ له‌ناو پڕۆژه‌كه‌دا له‌بری 67-12% بڕی 13.9% بۆ پشكی هه‌رێمی كوردستان دانراوه‌، هه‌ڵبه‌ت هه‌موو ئه‌مانه‌ كاتێك ده‌خرێته‌ بواری جێبه‌جێكردنه‌وه‌ كه‌ رێككه‌وتن له‌ده‌ره‌وه‌ی په‌رله‌مان بكرێت.

به‌ختیار شاوه‌یس ئاماژه‌ی بۆ ئه‌وه‌شكرد، پێویسته‌ له‌ماوه‌ی دوو هه‌فته‌ی داهاتوودا هه‌ولێر و به‌غدا له‌سه‌ر ئه‌و پرسه‌ رێكبكه‌ون، ئه‌گه‌ر نا ئه‌وا نه‌ك 13٫9 % به‌ڵكو 50٪ ی بودجه‌ش بۆ هه‌رێم دابنرێت، ئه‌وا دینارێك ناگاته‌ هه‌ولێر و ته‌نها مره‌كه‌بی سه‌ر كاغه‌ز ده‌بێت.

PUKmedia تایبه‌ت