دەستپێكردنەوەی پرۆسەی خوێندن بڕیاری لێدراو سەرەتای هەفتەی داهاتوو پرۆسەی خوێندنی قۆناغی 12ی ئامادەیی و 1ی 3ی 2021ش خوێندنی قۆناغەكانی تر دەستپێدەكاتەوە.

جوتیار عادل وتەبێژی حكومەتی هەرێم دوای كۆتاییهاتنی كۆبوونەوەی ئەنجومەنی وەزیران لەكۆنگرەیەكی رۆژنامەوانیدا رایگەیاند: لەكۆبوونەوەی ئەمڕۆی لیژنەی باڵای روبەڕوونەوەی كۆرۆنادا بڕیاردرا لە 16ی ئەم مانگەوە پرۆسەی خوێندن بۆ قۆناغی 12ی ئامادەیی دەستپێدەكاتەوەو رۆژی 2ی شوباتیش لیژنەی روبەڕووبونەوەی كۆرۆنا جارێكی تر كۆدەبێتەوەو دوای هەڵسەنگاندنی دۆخی تەندروستی بڕیاری پێویست دەدات.

وتیشی: رۆژی 1ی ئاداری ئەمساڵیش پرۆسەی خوێندن بۆ پۆناغەكانی تر دەستپێدەكات.

ئەوەشی خستەڕوو كە وەزارەتی پەروەردە پلانێكی وردی بۆ دەستپێكردنەوەی پرۆسەی خوێندنی داناوەو بەمنزیكانە خشتەی چۆنیەتی دەستپێكردنەوەی خوێندن و كاتی تاقیكردنەوەكان بۆ رای گشتی ئاشكرا دەكات. 

باسی لەوەشكرد كە بابەتی پشووەكان پلانی تایبەتی بۆ دانراوە تا قەرەبووی ئەو ماوەیە بكرێتەوە كە بەهۆی كۆرۆناوە دەرگای خوێندنگەكان داخرابوون. 

وتەبێژی حكومەتی وتیشی: هەر كۆمپانیایەك لەخاڵە سنورییەكان رەسمی نەبێت و مۆڵەتی نەبێت رێگە بەكاركردنی نادرێت، لەدەروازە سنورییەكانیش قاچاخچێتی هەیەو دەمانەوێت وەك حكومەت داهاتەكان كۆبكەینەوەو بۆ كۆنترۆڵكردنی خاڵە سنورییەكانشی هێزی هاوبەشی نێوان پێشمەرگەو ناوخۆ پێكدەهێنرێت و بڕیاری لێدراوە.