ئه‌نجومه‌نی جیهانی بۆ زێڕ: عیراق خاوه‌نی 96 تۆن زێڕه‌

.

ئه‌نجومه‌نی جیهانی بۆ (زێڕ) رایگه‌یاند: مانگی رابردوو بانكی ناوه‌ندی وڵاتانی جیهان پشكی زێڕیان له‌ یه‌ده‌گی دراوی بیانی وڵاته‌كانیان به‌رزكردۆته‌وه‌ و عیراق توانیویه‌تی پارێزگاری له‌ پێگه‌ی خۆی بكات و له‌ 38 هه‌مینی جیهاندا بۆ یه‌ده‌گی زێر بمێنێته‌وه‌.

ئه‌نجومه‌نی جیهانی بۆ زێڕ له‌ نوێترین راپۆرتیدا ئاماژه‌ی به‌وه‌كردووه‌: مانگی كانوونی یه‌كه‌می ساڵی 2020 بانكی ناوه‌ندی وڵاتانی جیهان 20 تۆن زێڕیان كڕیوه‌، به‌و شێوه‌یه‌ش ئێستا كۆی یه‌ده‌گی زێری وڵاتان گه‌یشتۆته‌ 35 هه‌زارو 191 تۆن.

ئه‌وه‌شی خستۆته‌ڕوو: هه‌ریه‌ك له‌ ئۆزبه‌كستان، هیندستان و كازاخستان له‌و وڵاتانه‌ بوون كه‌ زۆرترین زێڕیان كڕیووه‌ و هه‌ریه‌ك له‌ توركیا و مه‌نگۆلیاش یه‌ده‌گی زێریان له‌سه‌دا 2 پۆینت 4 كه‌میكردووه‌.

دووپاتیشیكردۆته‌وه‌، ئێستا عیراق خاوه‌نی 96 تۆن‌و 300 كیلۆ زێڕه‌‌و ئه‌و ژماره‌یه‌ش رێژه‌ی له‌سه‌دا 8 پۆینت پێنج له‌ كۆی یه‌ده‌گی دراوی بیانی ئه‌و وڵاته‌ پێكده‌هێنێت و له‌ پله‌ی پێنجه‌می وڵاتانی عه‌ره‌بی و 38 هه‌مینی جیهاندایه‌ بۆ یه‌ده‌گی زێر.

ئه‌وه‌شی خستۆته‌ڕوو، دواین پرۆسه‌ی كڕینی زێر له‌لایه‌ن عیراقه‌وه‌ له‌ ساڵی 2018دا بووه‌، به‌بڕی 6 تۆن‌و 450 كیلۆگرام‌و له‌ دوای ئه‌و كاته‌وه‌ هیچ بڕه‌ زێڕێكی نه‌كڕیووه‌.

PUKmedia ئاژانسه‌كان