به‌رزبوونه‌وه‌ی نرخی دۆلار زیان به‌كێڵگه‌كانی په‌له‌وه‌ر ده‌گه‌یه‌نێت

.

به‌رزبوونه‌وه‌ی به‌های دۆلار زیانی به‌ كێڵگه‌ په‌رله‌وه‌ریه‌كانی هه‌رێم گه‌یاندوه‌و بارودۆخه‌كه‌ به‌مشێوه‌یه‌ بڕوات دوورنیه‌ كێڵگه‌كانی په‌له‌وه‌ر دابخرێن.

 نازم عه‌بدوڵڵا جێگری سه‌رۆكی كۆمه‌ڵه‌ی كێڵگه‌ په‌له‌وه‌رییه‌كان  بۆ كه‌ناڵه‌كانی راگه‌یاندن رایگه‌یاند: به‌هۆی دابه‌زاندنی به‌های دینار له‌به‌رامبه‌ر دۆلاری ئه‌مریكیدا زیانێكی زۆر به‌ر خاوه‌نی كێڵگه‌ په‌له‌وه‌ریه‌كان كه‌وتووه‌، به‌و پێیه‌ی زۆرینه‌ی پێداویستی كێڵگه‌ په‌له‌وه‌ریه‌كان له‌بازاڕدا نرخیان به‌رزبوه‌ته‌وه‌.

وتیشی: ئێستا زۆرێك له‌ پێداویستیی كێڵگه‌ په‌له‌وه‌رییه‌كان له‌ده‌ره‌وه‌ به‌دۆلار ده‌كڕدرێت، له‌وانه‌ش ڤیتامین، ده‌رمان،  ڤاكسین و عه‌له‌ف،به‌وهۆكاره‌ش خاوه‌نی كێڵگه‌ په‌له‌وه‌رییه‌كان له‌بڕیاری دابه‌زاندنی به‌های دینار زه‌ره‌رمه‌ندبوون، به‌تایبه‌ت كه‌هێشتا نرخی فرۆشی گۆشتی مریشك، گۆرانكاریه‌كی ئه‌وتۆی به‌سه‌ردا نه‌هاتووه‌.

ئه‌وه‌شی خسته‌ڕوو: زیادبوونی ئاستی به‌رهه‌مهێنانی مریشك له‌ كێڵگه‌ په‌له‌وه‌ریه‌كان و به‌رده‌وامی هاورده‌كردنی مریشكی به‌ستوو هۆكارن بۆ ئه‌وه‌ی نرخی فرۆشی كیلۆیه‌ك گۆشتی مریشك له‌ دوو هه‌زارو 250 دینار تێنه‌په‌ڕێت و ئه‌و نرخه‌ش،  خاوه‌نی كێڵگه‌ په‌رله‌وه‌ریه‌كان زه‌ره‌رمه‌ند ده‌كات .

ئاماژه‌ی بۆ ئه‌وه‌شكرد، پێویسته‌ حكومه‌ت و وه‌زاره‌تی په‌یوه‌ندیدار چاره‌یه‌ش بۆ خاوه‌نی كێڵگه‌كانی په‌له‌وه‌ر بدۆزنه‌وه‌و ئه‌گه‌ر بارودۆخه‌كه‌ به‌مشێوه‌یه‌ بڕوات دوورنیه‌ سه‌رجه‌م كێڵگه‌كان دابخرێن.

PUKmedia تایبه‌ت