لەئاڵۆزییەكانی واشنتۆندا 4 كەس كوژران

.

لەئاڵۆزییەكانی شەوی رابردووی واشنتۆندا كە لایەنگرانی ترەمپ گەمارۆی بینای كۆنگرێسی ئەمریكایاندا 4 كەس كوژراون و 52 تریش دەستگیركراون، ئەوانەشی تەقەیان كردوە فەرمانی دەستگیركردنیان دەرچووە.

رۆبەرت كۆنتی فەرماندەی پۆلیسی واشنتۆن لەكۆنگرەیەكی رۆژنامەوانیدا رایگەیاند: دوای گەمارۆدانی بینای كۆنگرێسی ئەمریكا لەلایەن لایەنگران دۆناڵد ترەمپ سەرۆكی ئەمریكاوە بۆ رێگریكردن لەپەسەندكردنی سەركەوتنی جۆو بایدن سەرۆكی هەڵبژێردراوی نوێی ئەمریكا بەهۆی دروستبوونی ئاڵۆزییەوە 4 كەس كوژراون و 52ی تریش دەستگیركراون.

وتیشی: 47 لەوانەی دەستگیركراون بەهۆی شكاندنی قەدەغەی هاتووچۆوە بووە كە لەلایەن سەرۆكی شارەكەوە بڕیاری لێدرابوو، هەروەها لەكۆی 52 دەستگیركراوەكە لەناو بینای كۆنگرێسدا 26 كەس دەستگیركراون و فەرمانی دەستگیركردنیش بۆ ژمارەیەك كەسی تر دەرچوە تەقەیان كردوە. 

فەرماندەی پۆلیسی واشنتۆن لەكۆنگرەكەیدا ئەوەشی ئاشكراكردوە كە دوو بۆمب لەناو بارەگای لیژنەی نیشتمانی كۆمارییەكان و دیموكراتەكاندا دۆزراونەتەوەو لەناو بینای كۆنگرێسیش مۆلۆتۆفی ئاگرین بەكارهێنراوە. 

لەبارەی ئەوانەشی كوژراون، دەڵێت: ژنێك و سێ پیاون، ژنكە بەهۆی تەقەی یەكێك لەپۆلیسەكانەوە بووە كە ئەركیان پاراستنی كۆنگرێس بووەو لێكۆلَِینەوە لەبارەی رووداوەكەوە بەردەوامە.

PUKmedia ئاژانسەكان