riklam

مۆتیفه‌ شیعرییه‌كانی هه‌ندرێن خۆشناو له‌پێشانگایه‌كدا

ئەدەب وهونەر 11:55 AM - 2020-12-24
.

.

 

هه‌ندرێن خۆشناوی شێوه‌كار و كاریكاتێریست و رۆژنامه‌نووس، له‌ چالاكییه‌كی نوێدا كۆمه‌ڵێك به‌رهه‌م پیشانی هونه‌ردۆستان و ئاره‌زوومه‌ندانی هونه‌ر ده‌دات، كۆمه‌ڵه‌ به‌رهه‌مه‌كانی بریتین له‌ چه‌ند مۆتیفێك له‌ ژێر ناوی (مۆتیفه‌ شیعرییه‌كان)دا كۆبوونه‌ته‌وه‌، له‌ پێشانگایه‌كدا خۆیان پیشانی بینه‌ران ده‌ده‌ن، پێشانگایه‌كی ئۆنڵاین و له‌ چه‌ندین سایتی هونه‌ری ناوه‌وه‌ و ده‌ره‌وه‌ی كوردستان.

پێشه‌كی له‌ پێناسه‌یه‌كی كورتی مۆتیفدا.

هه‌ندرێن خۆشناو وتی: مۆتیف له‌ ئه‌سڵدا وشه‌یه‌كی فه‌ره‌نساییه‌، له‌ ئه‌ده‌بدا به‌ مانای بیرۆكه‌ی سه‌ره‌كی، یان ئه‌و بابه‌ته‌ی كه‌ دووباره‌ ده‌بێته‌وه‌ له‌ به‌رهه‌می ئه‌ده‌بیدا، یان چه‌مكێكی دووباره‌ و چه‌ندباره‌ كراوه‌، له‌ شیعریشدا هه‌ڵگری نیشانه‌ و ئاماژه‌ سیمبولیه‌كانه‌ كه‌ په‌یوه‌ندیه‌كی پته‌ویان له‌گه‌ڵ هه‌ست و ناخ و بیروڕاكانی شاعیردا هه‌یه‌، له‌ هونه‌ریشدا ئه‌و وێنه‌یه‌یه‌ كه‌ ده‌ربڕی حاڵه‌تێكی ئه‌ده‌بی یان هه‌ڵوێستێك یان رووداوێك له‌ چیرۆكێكی دیاركراوه‌، كه‌ ده‌بێته‌ سیمبولێك بۆ ناسینی ئه‌و حاڵه‌ته‌ دیاركراوه‌، له‌ هزر و بیری بینه‌ردا ده‌مێنێته‌وه‌ و ته‌مه‌نێكی درێژتر به‌ نووسینه‌ ئه‌ده‌بیه‌كه‌ ده‌به‌خشێت.  هونه‌رێكی گرافیكی ساده‌یه‌ و واباوه‌ كه‌ به‌ ره‌ش و سپی بكێشرێت، و بابه‌تی مۆتیفه‌كه‌ش له‌ بابه‌تی نووسینه‌ ئه‌ده‌بییه‌كه‌ هه‌ڵێنجراوه‌.

سه‌ره‌ڕای ئه‌وه‌ی كه‌ به‌رهه‌مه‌كانی ئه‌و پێشانگایه‌ كاری ساڵانی پێشووترن و هی نزیكه‌ی 15 ساڵ به‌ر له‌ ئێستان، و له‌گه‌ڵ پارچه‌ هۆنراوه‌ و شیعرییه‌كاندا بڵاوكراونه‌ته‌وه‌، به‌ڵام یه‌كه‌م جاره‌ له‌ پێشانگایه‌كدا نمایش ده‌كرێن، به‌ ستایلێكی نوێ و هونه‌ریانه‌ كۆكراونه‌ته‌وه‌، و ئه‌رشیفكراون، و بینه‌رێكی زۆرتر له‌ هۆڵی پێشانگاكان ده‌توانن بیانبینن.

هه‌ركه‌ بینه‌ر چاوی به‌ مۆتیفه‌كان ده‌كه‌وێت، هه‌ست به‌ جیاوازی كار و ستایل و شێوازی كاركردنی هونه‌رمه‌ند ده‌كات، سه‌ره‌ڕای ئه‌وه‌ی كه‌ كاری ساڵانی پێشووترن، به‌ڵام هه‌ست به‌ ماندووبوون و داهێنانێك ده‌كرێت له‌ ئه‌نجامدانی بیرۆكه‌كاندا، واباوه‌ كه‌ هونه‌رمه‌ندان مۆتیف به‌ ساده‌یی و به‌بێ ره‌نگ به‌ ره‌ش و سپی ده‌كێشن، به‌ڵام له‌م مۆتیفانه‌ی هونه‌رمه‌نددا ره‌نگ به‌ شێوه‌یه‌كی به‌رفراوان به‌كارهاتووه‌ و چه‌ندین كار و ئه‌ركی هونه‌ری پێ سپێردراوه‌.

له‌م باره‌یه‌وه‌ هه‌ندرێن خۆشناو وتی: ئه‌و سه‌رده‌مه‌ی كاركردن له‌م مۆتیفانه‌دا هه‌وڵمداوه‌ جیاوازییه‌ك بكه‌م له‌ كاره‌كانمدا، راسته‌ كه‌ واباوه‌ مۆتیف به‌ ره‌ش و سپی بكێشرێت، به‌ڵام من هه‌وڵمدا ره‌نگ بخه‌مه‌ ناو ئه‌و هونه‌ره‌ گرافیكیه‌ و ژیان و جووڵه‌یه‌كی پێ ببه‌خشم وه‌كو هه‌ر كه‌ڤاڵێكی شێوه‌كاری تر مامه‌ڵه له‌گه‌ڵیاندا بكه‌م، هه‌روه‌ها ئه‌و كاتی یه‌كه‌م جار بوو كه‌ مۆتیف به‌ شێوه‌ی دیگیتاڵ ئارت بكێشرێت و بڵاوبكرێته‌وه‌، ئه‌م به‌رهه‌مانه‌ هه‌موو به‌ كۆمپیوته‌ر كێشراون و دیگیتاڵ ئارتن، ئه‌و كات ئه‌مه‌ ده‌ستپێشخه‌ری و شتێكی نوێ بوو.

 

 PUKmedia محه‌مه‌د به‌رزنجی – هه‌ولێر

32323232.jpg

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket