قوباد تاڵه‌بانی: ده‌سه‌ڵاتم بۆ سزادانی ژنكوژان به‌كارده‌هێنم

.

جێگری سه‌رۆكی حكومه‌تی هه‌رێمی كوردستان ڕایده‌گه‌یه‌نێت له‌ 10 مانگی ڕابردوودا زیاتر له‌ 8 هه‌زار ژن توندوتیژیان به‌رامبه‌ر كراوه‌.

قوباد تاڵه‌بانی جێگری سه‌رۆكی حكومه‌تی هه‌رێمی كوردستان له‌ لاپه‌ڕه‌ی تایبه‌تی خۆی له‌ فه‌یسبووك له‌ڕۆژی جیهانی به‌ره‌نگاربوونه‌وه‌ی توند وتیژی دژی ژنان نووسیویه‌تی: له‌ ماوه‌ی 10 مانگی ڕابردوودا زیاتر له‌ 8 هه‌زار ژن  توندوتیژییان به‌رامبه‌ر كراوه‌ و زیاتر له‌ 6 هه‌زار سكاڵای توندوتیژی لای حكومه‌ت تۆمار كراوه‌ و به‌ڕێوه‌به‌رایه‌تی به‌ره‌نگاربوونه‌وه‌ی توندوتیژی خێزانی توانیویانه‌ لێكۆڵینه‌وه‌ی ته‌واو بۆ نزیكه‌ی چوار هه‌زار حاڵه‌ت بكه‌ن و دۆسیه‌كان بخه‌نه‌ به‌رده‌م دادگا.

قوباد تاڵه‌بانی ئاماژه‌ی به‌وه‌شكردووه‌ كه‌ هه‌موو ده‌سه‌ڵاتی سیاسی و یاسایی خۆی بۆ ده‌ستگیركردن و سزادانی ژنكوژان و هه‌موو ئه‌وانه‌ی كه‌ توندوتیژی دژی ژنان ئه‌نجام ده‌ده‌ن به‌كار ده‌هێنێت.

جێگری سه‌رۆكی حكومه‌ت هه‌روه‌ها نووسیویه‌تی: ئه‌ركه‌ له‌سه‌ر ھه‌ر یه‌كێكمان دژ به‌ توندوتیژی و نایه‌كسانیی جێنده‌ریی بوه‌ستینه‌وه‌ و ھه‌نگاو بنێین به‌ره‌و ھێنانه‌دی ھاوسه‌نگی جێنده‌ری له‌ پێناو گه‌یشتن به‌ كۆمه‌ڵگایه‌كی ته‌ندروست.

PUKmedia تایبه‌ت