هەڵەبجە.. داوای كردنەوەی بەڕێوەبەرایەتی توندوتیژی دژی ژنان دەكرێت

.

لە هەڵەبجە ئامارەكانی توندوتیژی دژی ژنان كەمی كردووە و وتەبێژی پۆلیسی هەڵەبجەش دەڵێت، هیچ حاڵەتێكی كوشتنی ژنان لە پارێزگاكە تۆمار نەكراوە، هاوكات رێكخراوی نوێ بۆ پاراستنی ژینگەو مافەكانی ژنان گردبوونەوەیەكیان رێكخست و داوای كردنەوەی بەڕێوەبەرایەتی توندوتیژی دژی ژنان-یان كرد.

لەو بەیاننامەیەدا كە وێنەیەكی بە PUKmedia دراوە هاتووە: ئەمساڵ جیاواز لەساڵانی كە توندوتیژییەكان زیادیان كردووە بەهۆی بارودۆخی نەخوازراوی تەندروستی كەبەشێكی زوری ژنان بوونەتە قوربانی، سەرەڕای بارگرانی توندوتیژی ئابووری كە كاریگەری خراپی لەسەر خێزانەكان دروست كردووە. 

لەبەیاننامەكەدا ئەوەشخراوەتە روو: لەپارێزگای هەڵەبجە سەرەڕای خستنەڕووی داواكارییەكانمان، داوای كردنەوەی بەڕێوەبەرایەتی توندوتیژی دژی ئافرەتان دەكەین، كەماوە ساڵێكە فەرمانی دەرچووە، هەروەها هەوڵدان بۆ كردنەوەی شوێنێك بۆ داڵدەدانی ئەو ژنانەی توندوتیژیان دەكرێتە سەر .

ئاماژە بەوەشكراوە: پێویستە هەوڵی زیاتر بدرێت بۆ دروستكردنی دەرفەتی كار بۆ ژنان و كچان كە رێژەیەكی زۆریان دەرچووی زانكۆ و پەیمانگاكان تا پشت بەخۆیان ببەستن و ئەمەش هەنگاوێكە بۆ كەمكردنەوەی توندو تیژییەكان. 

لەكۆتایی بەیاننامەكەدا جەختكراوەتەوە: كاردەكەین بۆ بەجێگەیاندنی داواكاری ژنان و ماندوو نابین، لە هەڵمەتی 16 رۆژ بەرەنگار بوونەوەی توندو تیژی دژ بە ژنان دووپاتی داواكاریەكانمان دەكەینەوە و بەڵێنی بەردەوامی دەدەین.

هاوكات لەپارێزگای هەڵەبجە ئامارەكانی توندوتیژی دژی ژنان رووی لەكەمی كردووە و وتەبێژی پۆلیسی هەڵەبجەش دەڵێت، هیچ حاڵەتێكی كوشتنی ژنان لەپارێزگاكە تۆمار نەكراوە.

موقەدەم بەرزان عوسمان وتەبێژی پۆلیسی هەڵەبجە رایگەیاند، ئامارەكانی توندووتیژی دژی ژنان لە پارێزگای هەڵەبجە رووی لەكەمی كردووە و ساڵی 2019 ، 75 دۆسییەی لێكۆڵینەوە تۆماركراوە.

ئەوەشی خستوەتەڕوو: لەماوەی 11 مانگی ئەمساڵدا 37 دۆسییەی توندوتیژی دژ بەژنان تۆماركراوە لەپارێزگاكە و هیچ حاڵەتێكی كوشتنی ژنان لە سنووری پارێزگای هەڵەبجە تۆمار نەكراوە.

PUKmedia كۆسار مەحمود