توركیا گونده‌كانی سنووری پارێزگای دهۆك بۆردومان ده‌كات

.

فڕۆكه‌ جه‌نگییه‌كان و تۆپخانه‌كانی توركیا هاوینه‌هه‌وار و گونده‌كانی ناحیه‌ی شیلادزێ و باتیفا و ده‌ركار- له‌ سنوری پارێزگای دهۆك بۆردومان ده‌كه‌ن و زیانێكی زۆر به‌ر دارستان و ڕه‌ز و باخی هاووڵاتیان ده‌كه‌وێت.

سه‌رچاوه‌ه‌كی تایبه‌ت ئه‌مڕۆ 8-8-2020، به‌ PUKmedia ی  ڕایگه‌یاند: توركیا له‌ ڕێگه‌ی تۆپخانه‌كانییه‌وه‌ گونده‌كانی ده‌ڤه‌ری "نهێل"یان له‌ ناحیه‌ی شیلادزێی سه‌ر به‌ پارێزگای دهۆك تۆپیاران كرد و له‌ ڕێگه‌ی فڕۆكه‌ جه‌نگییه‌كانیشه‌وه‌ "چیای گاره‌ و گوندی سیته‌" و هاوینه‌هه‌واری "گه‌لی ڕێكا"یان له‌ سنووری هه‌مان ناحیه‌ی بۆردومانكردووه‌ و ڕووبه‌رێكی زۆر له‌ دارستانی ناوچه‌كه‌ سوتاوه‌، ئه‌و هاووڵاتیانه‌شی بۆ پشوودان له‌ هاوینه‌هه‌واری "گه‌لی ڕێكا" بوون به‌هۆی مه‌ترسی بۆردوومانه‌كه‌وه‌ ناوچه‌كه‌یان چۆڵكردووه‌.

 وتیشی: ڕۆژانه‌ فڕۆكه‌ جه‌نگییه‌كان و تۆپخانه‌كانی توركیا سنووری ناحییه‌كانی باتیفا و ده‌ركار له‌ دهۆك بۆردوومان ده‌كه‌ن. ئه‌وه‌ش له‌ كاتێكدایه‌ سوپای توركیا له‌ سه‌ره‌تای له‌شكركێشییه‌كانییه‌وه‌ تاوه‌كو ئێستا زیاتر له‌ ٣٠ كیلۆمه‌تر هاتووه‌ته‌ ناو خاكی هه‌رێمی كوردستان و زیاتر له‌ ٥٠٠ گوندیش به‌هۆی مه‌ترسی بۆردوومانه‌كانه‌وه‌ چۆڵكراون.

PUKmedia تایبه‌ت