جه‌خت له‌ به‌هێزكردنی پێگه‌ی عیراق كرایه‌وه‌

.

د.به‌رهه‌م ساڵح سه‌رۆك كۆماری عیراق، ئه‌مڕۆ8-8-2020، له‌ كۆشكی به‌غدا، پێشوازیكرد له‌ فوئاد حسێن وه‌زیری ده‌ره‌وه‌ و سه‌باره‌ت به‌ په‌یوه‌ندییه‌ ده‌ره‌كییه‌كانی وڵات و چۆنیه‌تی به‌رزكردنه‌وه‌ و به‌ره‌وپێشبردنی بۆ ئاستێكی به‌رزتر له‌گه‌ڵ وڵاتان گفتوگۆی له‌باره‌وه‌كرا.

له‌ دیداره‌كه‌دا سه‌رۆك كۆمار جه‌ختی له‌پێویستی به‌هێزكردنی پێگه‌ی عیراق له‌ ناوه‌نده‌ نێوده‌وڵه‌تییه‌كان كرده‌وه‌، تاوه‌كو عیراق ببێته‌ به‌شێك له‌ ره‌خساندنی كه‌شێكی له‌بار بۆ لێكتێگه‌یشتن و دیالۆگی بونیادنه‌ر بۆ چه‌سپاندنی ئاسایش و سه‌قامگیری له‌ نیوان وڵاتانی ناوچه‌كه‌دا، ھاوكات دوپاتیشیكرده‌وه‌ له‌گرنگی رۆڵی هاوسه‌نگ و ئیجابی عیراق له‌ كاروانی په‌یوه‌ندییه‌ ده‌ره‌كییه‌كان، به‌جۆرێك ببێته‌ مایه‌ی به‌دیهێنانی ئاشتی و پێشكه‌وتن له‌ نێوان گه‌لان.

هه‌ر له‌و دیداره‌دا دواین پێشهاته‌كان له‌سه‌ر ھه‌ردوو ئاستی هه‌رێمایه‌تی و نێوده‌وڵه‌تی و كاریگه‌ریان له‌سه‌ر گۆڕه‌پانی عیراق تاوتوێكرا.

PUKmedia