هه‌زاران ئێزدی رۆژه‌ ره‌شه‌كه‌ی شه‌نگال لای داعشن

.

ئه‌مڕۆ 3-8-2020، شەش ساڵ به‌سه‌ر كاره‌ساتی داگیركردنی شه‌نگال له‌ لایه‌ن تیرۆرستانی داعش و كۆمه‌ڵكوژی و جینۆسایدكردنی هاووڵاتییانی ئێزدیی له‌ شه‌نگال و ده‌وروبه‌ری تێپه‌ڕده‌بێت و به‌پێی دواین ئاماری نووسینگه‌ی رزگاركردنی رفێنراوه‌ ئێزدییه‌كان-یش، تا ئێستا دوو هه‌زار و 908 هاووڵاتیی ئێزدی له‌لای داعش ماون و نه‌توانراوه‌ رزگار بكرێن.

له‌و باره‌یه‌وه‌ خه‌یری بۆزانی، به‌ڕێوه‌به‌ری گشتی كاروباری ئێزدییه‌كان له‌ وه‌زاره‌تی ئه‌وقاف و كاروباری ئاینی حكومه‌تی هه‌رێمی كوردستان به‌ PUKmedia ی راگه‌یاند: به‌پێی دواین ئامار كه‌ له‌ رۆژی 1-8-2019، ده‌رچووه‌، له‌ رۆژی 3ی ئابی 2014ه‌وه‌ كه‌ داعش شه‌نگالی داگیركرد، تا ئێستا له‌كۆی شه‌ش هه‌زارو 417 كه‌س كه‌رفێنراون توانراوه‌، 3 هه‌زار و 509 هاووڵاتیی له‌ ژێر ده‌ستی داعش رزگاربكرێن، كه‌ هه‌زار و 192 ژن  337 پیاو و هه‌زارو 33 كچی منداڵ و 947 منداڵی كوڕ بوون.

راشیگه‌یاند: ژماره‌ی رفێنراوه‌كان شه‌ش هه‌زارو 417 كه‌س بوون، كه‌ سێ هه‌زار و 548 كه‌سیان ژن و دوو هه‌زار و 869 كه‌سیان پیاو بوون.
وتیشی: له‌ ئێستاشدا دوو هه‌زار و 908 هاووڵاتیی ئێزدی له‌لای داعش ماون كه‌ هه‌زار و 323 ژن و هه‌زار و 585 پیاون.

بۆزانی ئه‌وه‌شی خسته‌ڕوو له‌ 3ی ئابی 2014 دا كاتێك داعش شه‌نگالی داگیركرد، هه‌زار و 293 كه‌س شه‌هید كراون و تا شێستاش 80 گۆڕی به‌كۆمه‌ڵ دۆزراونه‌ته‌وه‌، جگه‌ له‌ ده‌یان گۆڕی تر كه‌ روفاتی ئێزیدییه‌كانی تێدا دۆزراونه‌ته‌وه‌.

وتیشی: 68 مه‌زاری ئاینی ئێزیدییه‌كان له‌لایه‌ن تیرۆرستانی داعشه‌وه‌ ته‌قێنراونه‌ته‌وه‌، 100 هه‌زار هاووڵاتی ئێزدیش ئاواره‌ی وڵاتانی ده‌ره‌وه‌ بوون.

PUKmedia  تایبه‌ت

‌