سه‌رۆكی په‌رله‌مان پیرۆزبایی له‌ حزبی شیوعی ده‌كات

.

په‌یامی پیرۆزبایی سه‌رۆكی په‌رله‌مان بۆ ساڵیادی دامه‌زراندنی حزبی شیوعی كوردستان
به‌بۆنه‌ی 27 ساڵه‌ی یادی دامه‌زراندنی حزبی شیوعی كوردستان د. ڕێواز فایه‌ق سه‌رۆكی په‌رله‌مانی كوردستان په‌یامێكی پیرۆزبایی ئاراسته‌ی سكرتێر و ئه‌ندامانی حزبه‌كه‌ كرد، ئه‌مه‌ی خواره‌وه‌ ده‌قی په‌یامه‌كه‌یه‌:

به‌ڕێز/ سكرتێری حزبی شیوعی كوردستان

به‌ڕێزان/ ئه‌ندامانی مه‌كته‌بی سیاسی و ئه‌ندامان و لایه‌نگرانی حزبی شیوعی كوردستان

به‌ بۆنه‌ی (27) مین ساڵیادی ڕاگه‌یاندنی حزبی شیوعی كوردستان، گه‌رمترین پیرۆزبایی خۆمان ئاڕاسته‌ی سكرتێر وئه‌ندامانی مه‌كته‌بی سیاسی و سه‌رجه‌م ئه‌ندامان و لایه‌نگرانی حزبه‌ تێكۆشه‌ره‌كه‌تان ئه‌كه‌ین.

حزبی شیوعی له‌ مێژووی خۆیدا خاوه‌نی خه‌بات و تێكۆشانێكی فیكری و فه‌رهه‌نگی گه‌وره‌یه‌، وه‌ك هێزێكی سیاسی ئازادیخواز و یه‌كسانیخواز كاریگه‌ری به‌رچاوی له‌ فه‌راهه‌مكردنی بیری ئازاد و پێگه‌یاندنی كۆمه‌ڵایه‌تی له‌ كوردستان هه‌بووه‌،و داكۆكیكارێكی سه‌رسه‌ختی نه‌هێشتنی جیاوازی چینایه‌تی و به‌رقه‌راركردنی یه‌كسانی نێوان ژن و پیاو بووه‌،بۆیه‌ به‌تایبه‌ت له‌ مێژووی خه‌باتی سیاسی و مه‌ده‌نی دوای ڕاپه‌ڕین و دامه‌زراندنی په‌رله‌مان و حكومه‌تی هه‌رێمی كوردستان،حیزبی شیوعی كوردستان شوێنێكی تایبه‌ت و گه‌شی بۆخۆی تۆمار كردووه‌.

ئومێده‌وارم ئه‌م یاده‌ پیرۆزه‌ ببێته‌ مایه‌ی توندو تۆڵبوونی زیاتری په‌یوه‌ندی نێوان هێزو لایه‌نه‌ سیاسیه‌كانی كوردستان و ده‌ربازبوونی هه‌رێمه‌كه‌مان له‌ قه‌یران وناخۆشیه‌كان، جارێكی تر پیرۆزبایی ئه‌م یاده‌تان لێده‌كه‌م و هیوای به‌رده‌وامی و سه‌ركه‌وتنتان بۆ ئه‌خوازم.

د. ڕێواز فایه‌ق

سه‌رۆكی په‌رله‌مانی كوردستان

PUKmedia