riklam

كۆرۆنا ھه‌یه‌ ؟

بیروڕا 10:51 PM - 2020-06-03
.

.

گیان له‌ده‌ستدانی حه‌وت كه‌س له‌ رۆژێكداو توشبونی زیاتر له‌ سه‌د كه‌سی تر له‌ رۆژێكی تردا ئاماژه‌ی په‌ره‌سه‌ندنێكی خێراو مه‌ترسیداری كۆرۆنایه‌ له‌ ھه‌رێمی كوردستان و ناكرێت وه‌ك زه‌نگێكی مه‌ترسیدار سه‌یر نه‌كرێت ، ئه‌مه‌ پێویستی به‌ ھه‌ڵوێسته‌ له‌سه‌ركردنه‌و لانی كه‌م پێویست ده‌كات چاوی خۆمان له‌ ئاست ئه‌و مه‌ترسیه‌ دانه‌خه‌ین و بێخه‌م نه‌بین له‌ ئاستیدا، ناكرێت ئه‌وه‌نده‌ ھۆشیاریمان نه‌بێت ئه‌مه‌ به‌ڵایه‌كی جیھانییه‌و به‌ ئامانج گرتنی ژیانی ھه‌موو مرۆڤایه‌تییه‌ و كوردستانیش به‌ده‌رنیه‌ له‌و ھه‌رِه‌شه‌ گه‌وره‌یه‌،

ئه‌وه‌ی ئێستا رووده‌دات ده‌توانین بڵێین ته‌وژمێكی نوێی كۆرۆنایه‌ كه‌ رووی له‌ھه‌رێمی كوردستان كردووه‌، به‌پێی قسه‌ی پزیشكه‌كان ئه‌م ته‌وژمه‌ی كۆرۆنا توندترو مه‌ترسی دار تره‌ ، به‌ھۆی نادیاری سه‌رچاوه‌كه‌ی و ده‌سته‌وه‌ستانی  تیمه‌ ته‌ندروستیه‌كان له‌ماوه‌یه‌كی كه‌مدا ژماره‌یه‌كی زۆر له‌ خه‌ڵك تووش بوون و به‌شێكیان گیانیان له‌ده‌ست داوه‌ ره‌نگه‌  له‌ چه‌ند رۆژی داھاتووشدا ژماره‌ی تووشبوان چه‌ند ھێنده‌ زیاد بكات،

له‌كاتێكدا كۆرۆنا ھه‌رِه‌شه‌یه‌كی مه‌ترسیداره‌ له‌سه‌ر ژیان و ته‌ندروستی خه‌ڵك به‌ڵام ئه‌و ده‌نگ و ھه‌وڵانه‌ش كه‌م نین كه‌ به‌مه‌به‌ست و ئامانجێكی دیاریكراو یاری به‌ ژیانی خه‌ڵكه‌وه‌ ده‌كه‌ن و ده‌یانه‌وێت له‌ مه‌ترسی كۆرۆنا كه‌م بكه‌نه‌وه‌و خه‌ڵك له‌ پابه‌ندبوون و خۆپارێزی سارد بكه‌نه‌وه‌ ته‌نانه‌ت ئه‌و گومانه‌ لای خه‌ڵك دروست بكه‌ن كه‌ كۆرۆنا له‌ كوردستان بونی نیه‌! وه‌ك ھه‌موو سێكته‌ره‌كانی تر له‌م مه‌مله‌كه‌ته‌ی خۆمان كۆرۆنا به‌سیاسی ده‌كرێت و ھه‌ندێك لایه‌ن ده‌یانه‌وێت سواری ئه‌و شه‌پۆله‌ ببن و نارِه‌زایه‌تی خه‌ڵك بۆ مه‌رامی سیاسی به‌كار بھێنن، له‌م گه‌مه‌یه‌دا خه‌ڵكی ئاسایی ده‌بێته‌ قوربانی، قوربانیه‌ك كه‌ باجه‌كه‌ی گیانی خۆیه‌تی ، بۆیه‌ ناكرێت له‌ ئاست ئه‌م مه‌ترسییه‌ گه‌وره‌یه‌ بێده‌نگ بین پێویسته‌ خه‌ڵك له‌وه‌ تێبگه‌ن كۆرۆنا مه‌ترسیه‌كی راسته‌قینه‌یه‌و بونی ھه‌یه‌ ھه‌ر باوه‌رِنه‌بوون و پابه‌ند نه‌بونێك دوور نیه‌ باجه‌كه‌ی  ژیانی خۆت و كه‌سه‌ ئازیزه‌كانت بێت، له‌نێو ئه‌و گێژاوه‌ی كۆرۆنا له‌سه‌ر ئاستی جیھان دروستی كردووه‌ جێگه‌ی سه‌ر سورِمانه‌ كه‌سانێك ھه‌بن له‌ ھه‌رێمی كوردستان بۆ مه‌به‌ست و ئامانجێكی سیاسی و دیاریكراو ئه‌وه‌نده‌ ئاست نزم و بێ ھه‌ست بن یاری به‌ ژیانی خه‌ڵكه‌وه‌ بكه‌ن و  به‌رِێیان بكه‌ن به‌ره‌و مه‌رگ و كاره‌ساتێكی گه‌وره‌ی مرۆیی،  ئێمه‌ له‌وه‌ تێده‌گه‌ین نه‌بونی ھۆشیاری تاك كێشه‌ گه‌وره‌كه‌یه‌ و پێویسته‌ خه‌ڵك  ئه‌وه‌نده‌ ھۆشیاری و تێگه‌یشتنێكیان ھه‌بێت كۆرۆنا مه‌ترسیه‌كی جیھانیه‌و ھیچ سنور و به‌ربه‌ست و كه‌سێك نا ناسێت و ئاشنایه‌تی له‌گه‌ڵ ھیچ نه‌ته‌وه‌یه‌ك نیه‌ ، له‌م ئافاته‌دا ته‌نیا ئه‌وانه‌ سه‌رده‌كه‌ون و رزگاریان ده‌بێت كه‌ به‌ته‌نگ ته‌ندروستی خۆیانه‌وه‌ن،

 له‌م قۆناغه‌دا ئه‌وه‌ی بۆ خه‌ڵك گرنگه‌ تا تووش نه‌بوون و نه‌بوون به‌یه‌كێك له‌وكه‌سانه‌ی كه‌ كۆرۆنا مه‌ترسی له‌سه‌ر ژیانیان دروستكردووه‌ خۆتان بپارێزن و گوێ به‌و ده‌نگۆیانه‌ مه‌ده‌ن كه‌ ده‌یانه‌وێت ساردتان بكه‌نه‌وه‌ له‌ خۆپارێزی ، ئێمه‌ له‌ نزیكه‌وه‌ ئاگادارین و ده‌زانین چی ده‌گوزه‌رێت و مه‌ترسییه‌كه‌ له‌ چ ئاستێكدایه‌ ، دڵنیابن ئه‌گه‌ر خۆمان نه‌پارێزین و گوێ به‌ مه‌ترسیه‌كانی كۆرۆنا نه‌ده‌ین له‌ ئاینده‌یه‌كی نزیكدا كاره‌ساتێكی گه‌وره‌ رووده‌دات كه‌ نه‌ حكومه‌ت و نه‌ ھیچ رێكخراوێكی جیھانی ناتوانن به‌ر به‌وكاره‌ساته‌ بگرن، توانای حكومه‌تی ھه‌رێم و ناوه‌نده‌ ته‌ندروستیه‌كانمان سنورداره‌و دۆخمان له‌و وڵاتانه‌ باشتر نابێت كه‌ كۆرۆنا ڤایرۆس كاولی كروون و ده‌رفه‌تی ژیانی بۆ نه‌ھێشتوونه‌ته‌وه‌،

ھه‌رچه‌نده‌ مه‌ترسیه‌كه‌ سات به‌سات له‌ زیادبوندایه‌ به‌ڵام ئێستاش ده‌رفه‌ت ماوه‌ و ده‌كرێت به‌ر به‌و كاره‌ساته‌ بگرین كه‌ نزیكه‌ رووبدات، بۆ ئه‌وه‌ی خۆمان و كه‌سوكارمان پارێزراو بین ئه‌وه‌ی له‌م قۆناغه‌دا گرنگه‌ بیكه‌ین تاك پارێزی و دووركه‌وتنه‌وه‌یه‌ له‌ به‌ریه‌ككه‌وتن و شوێنی قه‌ره‌باڵغ، بۆ كارێكی زۆر گرنگ نه‌بێت نه‌چینه‌ بازارِو شوێنه‌ گشتیه‌كان و ئه‌گه‌ر كرا گواستنه‌وه‌ی گشتی به‌كار نه‌ھێنین و چه‌ند  پێمان ده‌كرێت له‌ماڵ بمێنینه‌وه‌ ، ئه‌گه‌ر ئه‌م رێكارانه‌ بگرینه‌ به‌ر تا راده‌یه‌كی زۆر پارێزراو ده‌بین به‌ڵام ئه‌گه‌ر پابه‌ند نه‌بین له‌ پرِ كۆرۆنا ده‌بێته‌ دوژمنێكی  قین له‌دڵ بۆ بون و مانه‌وه‌مان ،

گرنگه‌ له‌وه‌ تێبگه‌ین كۆرۆنا به‌ڵایه‌كی جیھانییه‌ و به‌رۆكی زۆربه‌ی ده‌وڵه‌تانی دونیای گرتووه‌، به‌ڵام بۆ ئه‌و ده‌وڵه‌تانه‌ی كه‌ ژێرخانێكی ئابووری و رۆشنبیری تاك تێیدا لاوازه‌ و له‌ ئاستێكی گه‌شه‌سه‌ندودا نیه‌ به‌ڵایه‌كی گه‌وره‌تر و مه‌ترسی دار تره‌، بۆ ئه‌وان كۆرۆنا زیاتر له‌ ھه‌رِه‌شه‌یه‌كه‌، بێگومان بۆ ھه‌رێمی كوردستان مه‌ترسی كۆرۆنا ھه‌رِه‌شه‌یه‌كی گه‌وره‌تر و دوژمنكارانه‌یه‌ واپێویست ده‌كات ھێنده‌ی مه‌ترسیه‌كه‌ له‌سه‌ر ئاستی حكومه‌ت و تاك خۆمانی بۆ ئاماده‌ بكه‌ین و به‌ره‌نگاری ببینه‌وه‌، ئێستا زانیتان كۆرۆنا له‌ كوردستان ھه‌یه‌ كه‌واته‌ ئازابه‌و خۆت و ده‌وروبه‌ره‌كه‌ت له‌م به‌ڵایه‌ رزگار بكه‌و مه‌به‌ به‌یه‌كێك له‌ توشبوانی كۆرۆنا.

مه‌ریوان عه‌بدوڵا

PUKmedia

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket