پێداچوونەوە بەقەدەغەی هاتووچۆ دەكرێت

.

وەزیری ناوخۆی هەرێم رایگەیاند: لەبابەتی كۆرۆنا حكومەت ئەركی خۆی جێبەجێ كردوەو ناكرێت هاووڵاتی تەنها بیر لەوە بكاتەوە كەسابەتی خۆی بكات و پابەندی رێكارەكان نەبێت.

رێبەر ئەحمەد وەزیری ناوخۆی حكومەتی هەرێم رایگەیاند:لە رابردوودا بەخۆپارێزی دەستكەوتی باشمان بەدەستهێنا، بەڵام دواتر خۆپارێزی وەك پێویست جێبەجێ نەكراوە.

راشیگەیاند: چاوەڕوان دەكرێت لە رۆژانی داهاتوودا ژمارەی گیان لەدەستدان زیاتر دەبێت، ئەوەش بەپێی هەڵسەنگاندنی تەندروستی و ژمارەی ئەوانەی لەهەولێرو سلێمانی باری تەندروستیان ناجێگیرە، هەروەها زۆربەی ئەو حاڵەتانەی كۆرۆناش كە لەچەند رۆژی رابردودا تۆمار كراون نیشانەیان هەبوو‌ە.‌

وتیشی:پێداچوونەوە بە راگەیەنراوی ژمارە 38ی ناوخۆدا دەكرێت كە چەند رۆژی رابردوو دەرچووە، دەسەڵاتیش دراوەتە پارێزگارو سەرۆكی ئیدارە سەربەخۆكان ئاسانكاری بۆ خەڵك بكرێت، بەتایبەت پێداویستی رۆژانەی خەڵك و سێكتەرەكانی ژیان كە وەرزی دروێنەو بەرهەمی كشتوكاڵی جوتیارانە تا بەرهەمەكانیان نەفەوتێت و ئاسانكاری بكرێت.

ئەوەشی وت: ناكرێت ئیدارەی پارێزگاكان و خەڵك داوای ماف بكات و ئەرك جێبەجێ نەكات، ناكرێت هاووڵاتی تەنها بیر لەوە بكاتەوە كەسابەتی خۆی بكات و پابەندی رێكارەكان نەبێت، بۆیە دەبێت هەر كەسێك سەرپێچی كرد سزا بدرێت.

وەزیری ناوخۆی هەرێم راشیگەیاند: هیچ نیازێكمان نیە قەدەغەی هاتووچۆ درێژ بكەینەوەو سبەینێ رێنمایی نوێ بڵاودەكرێتەوەو دەسەڵات دراوەتە پارێزگارو سەرۆكی ئیدارە سەربەخۆكان ئاسانكاری بكەن.

PUKmedia تایبەت