كۆسره‌ت ره‌سوڵ: ئه‌م دۆخه‌ پێویستی به‌ بڕیاری بوێرانه‌و حه‌كیمانه‌ هه‌یه‌

.

‎به‌بۆنه‌ی هاتنه‌وه‌ی جه‌ژنی ڕه‌مه‌زانی پیرۆز، به‌ناوی خۆم و هه‌ڤاڵانم له‌یه‌كێتیی نیشتمانیی كوردستان پیرۆزباییه‌كی گه‌رمتان ئاراسته‌ ده‌كه‌م، هیوادارم خوای گه‌وره‌ ڕۆژوو تاعه‌ت و عیباده‌تی هه‌موو لایه‌كمانی قبوڵ كردبێ و ئه‌م جه‌ژنه‌ ببێته‌ مایه‌ی خێرو خۆشی بۆ گه‌له‌كه‌مان و زاڵبین به‌سه‌ر قه‌یرانه‌كان.
‎ئه‌مساڵ جه‌ژنی ڕه‌مه‌زانی پیرۆز هاوكاتی بڵاوبوونه‌وه‌ی ڤایرۆسی كۆڕۆناو قه‌یرانی دارایی و وه‌ستانی جموجۆڵی بازرگانی و داراییه‌ له‌ جیهان و ناوچه‌كه‌ به‌شێوه‌یه‌كی گشتی، كه‌ بێگومان ئه‌مه‌ش كاریگه‌ری ڕاسته‌وخۆی له‌سه‌ر هه‌رێمی كوردستان و عێراق دروستكردووه‌و هاووڵاتیانی ڕووبه‌ڕووی ژیانێكی قوڕس كردۆته‌وه‌ و كارو كاسبی وه‌ستاوه‌و ژیان شێوازێكی جیاوازتر له‌جارانی وه‌رگرتووه‌، ئه‌ركه‌ له‌سه‌ر هه‌موومان له‌هێزو لایه‌نه‌ سیاسییه‌كان هاوكارو پشتیوان بین بۆ تێپه‌ڕاندنی ئه‌م دۆخه‌و پێویستیشه‌ حكومه‌تی هه‌رێمی كوردستان به‌رپرسانه‌ مامه‌ڵه‌ له‌گه‌ڵ بارودۆخه‌كه‌ بكات و له‌سه‌رووی هه‌موویانه‌وه‌ به‌ده‌م داواكاری هاووڵاتیانه‌وه‌ بێت و خزمه‌تگوزارییه‌ سه‌ره‌تاییه‌كان دابین بكاو مووچه‌ له‌كاتی خۆی دابه‌ش بكات.

‎هاونیشتمانیانی خۆشه‌ویست....
‎ئه‌م دۆخه‌ی ئه‌مڕۆ له‌كوردستان هه‌یه‌و كوردستانیانی گیرۆده‌ كردووه‌ پێویستی به‌ بڕیاری بوێرانه‌و حه‌كیمانه‌ هه‌یه‌ بۆ بنبڕكردنی، له‌ سه‌رووی هه‌موویانه‌وه‌ به‌ره‌نگاربوونه‌وه‌ی گه‌نده‌ڵی و په‌ره‌پێدانی شه‌فافیه‌ت و چاكسازی له‌ سێكته‌ره‌ جیاوازه‌كانی حوكمڕانی، به‌ جۆرێك سه‌رجه‌م داهات و سامانه‌كانی هه‌رێمه‌كه‌مان له‌ خزمه‌تی گه‌له‌كه‌مان و بۆ خۆشگوزه‌رانی هه‌رێمه‌كه‌مان به‌كاربێت، ئه‌ركێكی ئه‌خلاقی و نیشتمانیشه‌ كه‌ لایه‌نه‌ سیاسییه‌كان له‌بری ململانێ و شه‌ڕكردن له‌سه‌ر ده‌ستكه‌وته‌ حزبییه‌كان، دانیشن و به‌یه‌كه‌وه‌ كێشه‌كانی نێوانیان چاره‌سه‌ر بكه‌ن و ئه‌م دۆخه‌ تێپه‌ڕێنین و چیتر له‌ كه‌ناڵه‌كانی ڕاگه‌یاندنه‌وه‌ هێرش نه‌كه‌نه‌ سه‌ر یه‌كترو ده‌روونی هاووڵاتیان له‌وه‌ زیاتر ماندوو نه‌كه‌ن و له‌بری چاره‌سه‌ری بنه‌ڕه‌تی كێشه‌كان خه‌ڵك به‌ پرس و كێشه‌ی لابه‌لا سه‌رقاڵ نه‌كه‌ن و قه‌یرانی ده‌ستكرد دروست نه‌كه‌ن.
‎دووباره‌ پیرۆزبایی خۆم ئاراسته‌ی سه‌رجه‌م موسڵمانانی جیهان به‌گشتی و كوردستان به‌تایبه‌تی ده‌كه‌م و ئه‌م جه‌ژنه‌ پیرۆزه‌ به‌ ده‌رفه‌ت ده‌زانم سوپاسی تایبه‌تی پزیشكان و كارمه‌ندانی ته‌ندروستی و هێزه‌كانی ئاسایش و ناوخۆو پێشمه‌رگه‌ بكه‌م، كه‌ له‌كاتی قه‌یرانی كۆڕۆنادا ماندوونه‌ناسانه‌ كاریان كرد بۆ ڕێگرتن له‌زیاتر ته‌شه‌نه‌كردنی ڤایرۆسه‌كه‌، هه‌روه‌ها سوپاس بۆ خه‌ڵكی خۆڕاگری كوردستان كه‌ خۆڕاگرانه‌ له‌ماڵ مانه‌وه‌و پابه‌ندی ڕێنماییه‌كان بوون.

‎كۆسره‌ت ره‌سوڵ عه‌لی
‎سه‌رۆكی ئه‌نجومه‌نی باڵای سیاسی و به‌رژه‌وه‌ندی یه‌كێتیی نیشتمانیی كوردستان

PUKmedia تایبه‌ت