لەبارەی بینینی مانگ وەزارەتی ئەوقاف رونکردنەوە دەدات

.

وەزارەتی ئەوقاف رەتی دەکاتەوە کە لە هیچ ناوچەیەکی هەرێـمی کوردستان مانگ بینرابێت و راشیدەگەیەنێت سبەینێ لەسەرجەم وڵاتانی سونە مەزهەب بە هەرێمی کوردستانیشەوە تەواوکاری مانگی رەمەزان دەبێت.

لەو بارەیەوە نەبەز ئیسماعیل وتەبێژی وەزارەتی ئەوقاف و کاروباری ئاینی حکومەتی هەرێمی کوردستان تایبەت بە PUKmedia ی راگەیاند: هەموو ئەو دەنگۆیانە رەتدەکەینەوە کە باس لە بینینی مانگ دەکرێت لە قەزای سۆران لە هەرێمی کوردستان. 

وتیشی: لیژنەی بینینی مانگی سەر بە وەزارەتەکەمان دوای ئەوەی ئێوارەی ئەمڕۆ ٢٢-٥-٢٠٢٠  چاودێری بینی مانگیان کرد و نەبینرا،  رایانگەیاند کە سبەینێ تەواوکاری مانگی رەمەزانە و لەگەڵ ئەوەشدا لە سەرجەم وڵاتە سونەکانی جیهان بڕیار دراوە سبەینێ شەممە تەواوکاری مانگی رەمەزان دەبێت و دوو سبەی یەک شەممە یەکەم رۆژی جەژنی رەمەزانی پیرۆزە. 

ئەوەشی خستە روو: ئەو ڤیدیۆیەی بڵاو کراوەتەوە کە باس لە بینینی مانگ لە قەزای سۆران دەکات سەرچاوەکەی دیار نییە کوێیە و بە دڵنیایشەوە مۆنتاج کراوەو ڤیدیۆی رابردوە، بۆیە وەزارەتی ئەوقاف بە مافی خۆی دەزانێت کە سکاڵا تۆمار بکات لەسەر ئەو کەسانەی کە دەیانەوێت ئاشتی کۆمەڵایەتی بشێوێنن.

PUKmedia تایبەت