تەمیمی: پێشمەرگە رۆڵێكی گەورەی هەیە

.

پارێزگاری دیالە رۆڵی پێشمەرگە لەروبەرووبونەوەی تیرۆرستانی داعش بەرز دەنرخێنێت، و بوونی ژووری هاوبەشی نێوان سوپای عیراق و ئەو هێزە بەخاڵێكی بەهێز دەزانێت بۆ كەمكردنەوەی مەترسیەكانی داعش.

رۆڵی گەورەیان هەبووە

موسەنا تەمیمی پارێزگاری دیالە، بۆ PUKmedia ووتی: پێشمەرگە هێزێكی تۆكمەو گرنگە، بەتایبەت لەشەڕی روبەڕبوونەوەی تیرۆرستاندا رۆڵی بەرچاو گرنگیان هەبووە، لەهەموو ناوچەكەكانداو بەتایبەت سنوری دیالە.

باسی لەوەشكرد: لەسنورەكانی خانەقین و جەلەولا رێگرێكی گەورەبوون لەتەشەنەكردنی تیرۆرستان و پەلهاویشتنیان بۆ ناوچەكانی تر، ئەمەش دواجار بەهەماهەنگی هێزە عیراقیەكان بووە هۆی شكستی گەورەی داعش.

داعش لەناوچەكانی ترەوە دێتە دیالە 

تەمیمی لەبارەی رووداوەكانی ئەم دواییەی دەوروبەری خانەقین و چەند ناوچەیەكی تری دیالە، دەڵێت: داعش لەسنورەكانی پارێزگای سەڵاحەدین بەتایبەت ئەو ناوچانەی كە نەهێزو نەژیانی هاووڵاتیاتی تێدایە، بەهەلدەزانن و دەپەڕنەوە بەرەو پارێزگاكەمان، دواتر بەهیڵێكدا  تێدەپەڕن و لەسنوری قۆڕی چایی و چەند ناوچەیەكی ترەوە بەرەو ناوچەكانی كوڵەجۆو دەوروبەری خانەقین و عوزێم دزە دەكەن.

باس لەوەش دەكات: لەشێوەی گروپ كاردەكەن و بەچەند ناوچەیەكدا بڵاوەیان كردوە، زیان دەگەیەنن و دواتر شوێنەكانی خۆیان دەگۆڕن.

رێگە بەهیچ پێشێلكاریەك ناگرین 

لەبارەی  لەپاڵ كردەوەكانی داعشەوە، دەستێكی تر هەبێت كەبیەوێت بەتایبەت دژ بەكورد بوەستێتەوەو ناوچەكانیان پێ چۆڵ بكات، پارێزگاری دیالە باسی لەوەكرد: برا كوردەكانمان لەخانەقین و چەند ناوچەیەكی تردا زۆرینەن هیچ كات نەمانهێشتووە ئەو برایەتی و پێكەوەییە تێكبچێت، بەتایبەت برایانمان لەیەكێتیی نیشتیمانیی كوردستان هەماهەنگیەكی باش لەنێوانماندا هەیە، كەمێژوویەكی دێرینی هەیە، ئێمە نامانەوێت دەستبەرداری ئەوە بین و رێگە بەهیچ كەس و لایەنێكیش نادەین كاری ئاژاوە گێری بكات.

ژووری هاوبەش پێكبهێنرێت

موسەنا تەمیمی پارێزگاری دیالە ئەوەشی بۆ PUKmedia خستەڕوو:  لەبارەی ئەو رووداوانەی كە لەخانەقین و دەوروبەری روودەدەن، بەباشی دەزانین ژوورێكی هاوبەش لەنێوان هێزەكانی سوپای عیراق و حەشدی شەعبی و پێشمەرگە پێكبهێنرێت.

رونیشكردوەتەوە: ئەم ژوورە هاوبەش كاری هەماهەنگی و پێداچوونەوەی زیاتر بە ناوچەكەدا بكات و سنورەكان رێكبخرێنەوەو كاری هەواڵگری زیاتر بكرێت و سەرچاوەی تیرۆرستان لەناوچەكەدا لەناو ببرێت.

ئەوەشی ووت: بۆ ئەو مەبەستە داوامان لە وەزارەتەكانی ناوخۆو دەرەوە كردوەو هەڵوێستیان ئەرێنی بووەو چاوەڕوانی هەنگاوی كردارین.

PUKmedia سامان یاروەیس