لە ساڵیادی ماڵئاوایی شازاد سائیب ی نەمردا ..

.

لە رۆژێکی وەک ئەمڕۆ داو نۆزدە ساڵ بەر لە ئێستا دڵێکی گەورەی پڕ ئاوات و ئارەزوو .. مێشک و هۆشێکی پڕ لە حەز و پلانی ئایندە ..  مەرگی لە ناکاو بە کارەساتێکتی دڵتەزێن، بووە میوانی کاک ( شازاد )ی خۆشەویست و کاروانی دواکۆچی بۆ ریزی شەهیدانی بزاڤی رزگاریخوازی نەتەوەی کورد رێکخست. نۆزدە ساڵ لەمەوبەر خەمێکی جیاواز، کسپەیەکی کتوپڕی ناوەخت ئاسا، لەبەردەم عەشق و خۆشەویستی هاوڕێیەکی هەموواندا لە نێوان بڵندایەتی چیاکانی کوردستانەوە، بێ پاسپۆرت بۆ لای ئێمەی عاشقانی خەڵوەتگەی نیشتمان لە تاراوگە خۆی هەڵکشاند. لەم ساڵوەگەڕەی ئەم کەڵە پیاوەدا، ئەم سەرکردە خەباتگێڕ و ماندوو نەناسەدا، دەبێت چ وشەیەک، چ رستەیەک، چ وتارێک بۆ وەرزی ماتەمینی کاکە شازاد شایستە بێت؟ تا وەک تاجە گوڵینە لە ساڵیاد و دواکۆچ و بیرەوەرییەکانیدا دابنێین؟ چوون ئەم پیاوە جوامێرە تێکۆشەرێکی دێرین و سەرکردەیەکی چالاکی رۆژانی سەخت دژواری بزاڤتی رزگاری ئەم گەلە ستەمدیدەیە نەبوو، یان بەتەنیا پارێزەرێکی وریاو کارامەو یاساناس نەبوو، بەڵکو بەر لە هەموو ئەمانە، وەک مرۆڤدۆست و خۆشەویست و قسەخۆش و بێ فیز و هەژارناس ناسراو بوو .. هەمیشە هەوێنی تەبایی و یەکگرتن و یەکڕیزی کۆمەڵانی خەڵکی کوردستان بوو.

لە نۆزدەمین ساڵیادی ئەم کەسایەتییە ناودارەی میللتەکەمان، جێی خۆیەتی گەواهی لەسەر ئەوە بدەین کە یەکێتیی نیشتمانیی کوردستان، هەر لە سەرەتای دروستبوون و هەڵگیرسانەوەی شۆڕشی نوێی گەلەکەمانەوە، بەردەوام لە سەرکردەو کادیر و ئەندامە هەرە چالاکەکانی لە ریزی پێشەوەی خەبات و بەرخۆدان و شۆڕشدا بوون و دڵسۆزانە ئەرکەکانی یەکێتییان لە پێناو بزووتنەوەی رزگاری نەتەوەی کورددا جێبەجێ کردووە و هەمیشە بوونەتە قوربانی بەردەم هێڕش و شاڵاوە جۆراوجۆرە دڕندەکانی دوژمنانی کورد و بە کاروانی شەهیدان گەیشتوون.

لەم ساڵیادەیدا روو لە کاکە شا دەکەین و دەڵێین: ئەی خۆشەویستی هەمووان،  ئێستا لەنێو لانکی پڕ ئارامی نیشتمان نوستووی .. ئەی ئەو کەسەی بۆ هەمیشە خەندەی سەرفرازیت لەسەر لێوان بۆ دۆست و هاوڕێ و کەس وکارت دەباراند .. بێ خەم بە لە دڵسۆزی و وەفای کوردپەروەرانی نیشتمان.. پەیامی تۆ و رێبازی تۆ، ئەرکی پیرۆزی هەموو ئەو خەڵکەیە کە بەرز رایدەگرن، پیرۆزی خوێنی شەهیدان.

PUKmedia هیوا سەرهەنگ