د. ڕێواز فایه‌ق: په‌رله‌مان به‌رپرسه‌ له‌به‌رده‌م كوردستانیان

.

سه‌رۆكی په‌رله‌مانی كوردستانی به‌بۆنه‌ی بیست و هه‌شته‌مین ساڵڕۆژی ئه‌نجامدانی یه‌كه‌مین هه‌ڵبژاردنی په‌رله‌مانی كوردستان، گه‌رمترین پیرۆزبایی ئاڕاسته‌ ده‌كات ، ئه‌مه‌ی خواره‌وه‌ ده‌قی په‌یامه‌كه‌یه‌:

به‌بۆنه‌ی بیست و هه‌شته‌مین ساڵڕۆژی ئه‌نجامدانی یه‌كه‌مین هه‌ڵبژاردنی په‌رله‌مانی كوردستان، گه‌رمترین پیرۆزبایی ئاڕاسته‌ی سه‌رجه‌م كوردستانییانی خۆشه‌ویست ده‌كه‌ین.

هه‌ڵبژاردنی په‌رله‌مانی كوردستان له‌قۆناغێكی سه‌خت و دژواری دوای ڕاپه‌ڕین بڕیارێكی بوێرانه‌و حه‌كیمانه‌ی سه‌ركردایه‌تیی سیاسیی كوردستان بوو بۆ سه‌لماندنی ئه‌و ڕاستییه‌ی كه‌ خواست و ویستی كوردستانییان له‌ خۆبه‌ڕێوه‌بردن و ده‌وڵه‌تداریدا هیچی‌ له‌ گه‌لانی دیكه‌ی دونیا كه‌متر نییه‌.

گۆڕینی هه‌لومه‌رجی سه‌ختی دوای ڕاپه‌ڕین له‌كۆڕه‌وه‌وه‌ تاكشاندنه‌وه‌ی هه‌موو داموده‌زگا فه‌رمییه‌كان له‌لایه‌ن ڕژێمی پێشووی عێراق بۆ ده‌رفه‌ت و ده‌سكه‌وتی مه‌زن له‌هه‌ڵبژاردنی په‌رله‌مان و متمانه‌دان به‌كابینه‌ی یه‌كه‌می حكومه‌تی هه‌رێمی كوردستان، به‌رجه‌سته‌كردنی ئیراده‌ی پۆڵایین و خواست و توانای گه‌له‌كه‌مان بوو بۆ خۆبه‌ڕێوه‌به‌ری، هه‌مووشیان پێكه‌وه‌ گوزارشت بوون له‌خواستی گه‌لێكی سته‌ملێكراو بۆ دیموكراسییه‌ت و به‌ده‌ستهێنانه‌وه‌ی مافه‌ ‌ سیاسی و مه‌ده‌نی و فه‌رهه‌نگییه‌ زه‌وتكراوه‌كانی.

له‌ئێستاشدا په‌رله‌مانی كوردستان وه‌ك دامه‌زراوه‌یه‌كی ده‌ستووریی هه‌رێم له‌سنووری ده‌ستڕۆییه‌كانی خۆیدا به‌رپرسه‌ له‌به‌رده‌م كوردستانییان به‌بێ ڕه‌چاوكردنی باكگراوند، ئاین، نه‌ته‌وه‌و ئینتیمای سیاسییان له‌هه‌وڵدان بۆ به‌دیهێنانی ئامانجه‌ نه‌ته‌وه‌یی و نیشتیمانییه‌‌ باڵاكان و نوێنه‌رایه‌تیكردنی هاووڵاتییان له‌به‌دیهێنانی ماف و داخوازییه‌ ڕه‌واكانیان، چونكه‌ دواجار شكۆداری و متمانه‌ی هه‌ر دامه‌زراوه‌یه‌ك له‌به‌جێهێنانی ئه‌ركه‌ ده‌ستووری و یاسایی و ئه‌خلاقییه‌كانیدا به‌رجه‌سته‌ ئه‌بێت.

له‌م یاده‌ پیرۆزه‌دا سه‌ری ڕێزو نه‌وازش بۆ سه‌رجه‌م شه‌هیدانی كوردستان داده‌نه‌وێنین دروود بۆ ڕۆحی به‌رزه‌فڕیان و سڵاو بۆ خۆڕاگریی گه‌له‌كه‌مان.

د.ڕێواز فایه‌ق
سه‌رۆكی په‌رله‌مانی كوردستان

PUKmedia