مه‌ڵبه‌ندێ چوارێ ئێكه‌تی نیشتمانی: خۆپێشاندان مافه‌كێ ڕه‌وا و شه‌رعیێ خه‌لكێ كوردستانێ یه‌

.

مه‌ڵبه‌ندێ چوارێ دهوك یێ (ی.ن.ك) ڕاگه‌هاندنه‌ك ده‌ربارێ خۆپێشاندانێن ماموستا و فه‌رمانبه‌ر و چالاكڤانێن مه‌ده‌نی ل باژارێ دهوك به‌ڵاڤكر و تێدا داخوازكر ڕێز ل ماف و داخوازیێن خۆپێشانده‌ران بهێته‌گرتن، و خۆپێشاندان ب مافه‌كێ ڕه‌وا و شه‌رعی دا زانین.
ده‌قێ ڕاگه‌هاندنا ماڵبه‌ندێ چوارێ ئێكه‌تیی نیشتمانیی كوردستان

خه‌لكێ شه‌ره‌فمه‌ندێ ده‌ڤه‌را بادینان و باژارێ دهوك
ڕێزدار كارگێریا پارێزگه‌ها دهوك
ماموستا و فه‌رمانبه‌رێن به‌رێز و مه‌فخواز

دیاره‌ ڕه‌وشا ئابووری و داراییا ئالوز و ناله‌بار، كو ده‌رئه‌نجامێ به‌ڵاڤبوونا ڤایرۆسێ كوڕۆنا و داكه‌فتنا بهایێ نه‌فتێ لسه‌رانسه‌ری جیهانێ په‌یدابووی، بوارێ دارایێ هه‌رێما كوردستانێ و ژیان و ژیارا خه‌لكێ كوردستانێ ژی ئالۆزكر، و ماوێ پێنچ هه‌یڤا ژ ساڵا 2020 ده‌ربازبوون و هه‌تا نوكه‌ مووچێ هه‌یڤا ئێك نه‌هاتییه‌ دابه‌شكرن، له‌ورا ژنه‌چاری خه‌لكێ كوردستانێ په‌نا برییه‌ به‌ر خۆپێشاندان و چالاكیێن مه‌ده‌نی، و ل پارێزگه‌ها دهوك ژی ماموستا و فه‌رمانبه‌ران بۆ بده‌ستڤه‌ ئینانا مافێن خۆ یێن ئاسایی و ڕه‌ۆا، ل ئێڤارییا ڕۆژا شه‌مبی ڕێكه‌فتی 16 گولانێ خۆپێشاندانه‌كا مه‌ده‌نیانه‌ و ئاشتیانه‌ سازكر، به‌لێ مخابن ژلایێ هێزێن ئه‌منی ڤه‌ ڕێگری لێهاته‌كرن و هژماره‌كا ماموستا و فه‌رمانبه‌ر و چالاكڤانان هاتنه‌ ده‌سته‌سه‌ركرن.

ئه‌م وه‌كو مه‌ڵبه‌ندێ چوارێ ئێكه‌تی نیشتیمانی كوردستان، ژ پێگه‌هێ باوه‌ری بوون ب بنه‌مایێن دیموكراسیه‌تێ و ئازادیا خۆپێشاندان و ئازادییا ڕا ده‌ربڕینێ، خۆپێشاندان و خڕڤه‌بوونا 16 گولانێ یا ماموستا و فه‌رمانبه‌رێن باژارێ دهوك ب ڕه‌وا و شه‌رعی دزانین، بمه‌رجه‌كی ژ چارچووڤێ مه‌ده‌نیانه‌ و ئاشتیانه‌ ده‌رنه‌كه‌ڤیت.
هه‌ڤده‌م داخوازێ ژ ده‌ستهه‌ڵاتا خۆجهییا پارێزگه‌ها دهوك دكه‌ین ل گوره‌ی پڕنسیپێن دیموكراسی و مافی مروڤ سه‌ره‌ده‌ریێ دگه‌ل خۆپێشانده‌ران بهێته‌كرن، و بزووترین ده‌م سه‌رجه‌م خۆپێشانده‌ر و چالاكڤان و ڕۆژنامه‌نڤیسێن ژلایێ هێزێن ئێمناهیێ ڤه‌ هاتینه‌ ده‌سته‌سه‌ركرن، بهێنه‌ ئازادكرن.

ئومێده‌وارین حكومه‌تا هه‌رێما كوردستانێ خو ل داخوازیێن خه‌لكی بكه‌ته‌ خودان و چاره‌سه‌ریه‌كا بله‌ز بۆ قه‌یرانا دارایی ببینیت و مووچێ سه‌رجه‌م فه‌رمانبه‌رێن هه‌رێما كوردستانێ دابین بكه‌ت، و به‌رنامه‌ و پڕۆژێن گونجای داڕێژیت پێخه‌مه‌ت كێمكرنا ڕێژه‌یا بێكاریێ و خۆشگوزه‌رانییا وه‌ڵاتیان، كو شایسته‌ی ژیانه‌كا باشترن.

ئێكه‌تی نیشتمانی كوردستان
مه‌ڵبه‌ندێ چوارێ دهوك
16-5-2020

PUKmedia