حکومەتی هەرێم:پێش جەژن هەوڵدەدەین مووچەی هەموو وەزارەتەکان دابینبکەین

.

وتەبێژی حکومەتی هەرێم وتی،  دابەزینی نرخی نەوت هۆکارە بۆ کەمبونەوەی داهات، بەڵام ئێمە هەموو داهاتەکان بۆ موچە تەرخان دەکەین و هەموو هەوڵێک دەدەین پێش جەژنی رەمەزان مووچەی سەرجەم وەزارەتەکان دابەشبکەین

دوای کۆبونەوەی ئەمڕۆی ئەنجومەنی وەزیرانی حکومەتی هەرێمی کوردستان کە بە سەرپەرشتی مەسرور بارزانی و قوباد تالەبانی سەرۆک و جێگری سەرۆکی ئەنجومەنی وەزیرانی هەرێمی کوردستان و ئامادەبونی وەزیرەکان بەڕێوەچوو جوتیار عادل وتەبێژی حکومەتی هەرێمی کوردستان لە کۆنگرەیەکی رۆژنامەوانیدا رایگەیاند: لە مانگەکانی داهاتوودا مووچە بە گوێرەی داهات رێکدەخەینەوەو  هەموو هەوڵێک دەدەین پێش جەژنی رەمەزان مووچەی سەرجەم وەزارەتەکان دابەشبکەین.

وتیشی: دابەزینی نرخی نەوت هۆکارە بۆ کەمبونەوەی داهات و کورتهێنانی زۆر لە داهاتی هەرێمی کوردستاندا هەیەو ئێمە ئامادەین رۆژانە ٢٥٠ هەزار بەرمیل تەسلیمی بەغدا بکەین .

ئاماژەی بەوەشکرد، حکومەتی هەرێم چەندین کاری گرنگی هەیە بیکات و حوکومڕانی بەتەنیا بریتی نییە لە مووچە دابەشکردن .

جوتیار عادل ئەوەشدەخاتەروو، حکومەتی هەرێمی کوردستان لەساڵی ٢٠٢٠ دا ٣ مووچەی بەسەر مووچەخۆراندا دابەشکردوەو وتیشی، هەموو داهاتەکان بۆ موچە تەرخان دەکەین.

لەبارەی گفتوگۆکان و کۆبونەوەکانیش لەگەل بەغدا وتی، دەستور بە بنەمای چارەسەری کیشەکان لەگەڵ بەغدا دادەنێین.

PUKmedia تایبەت