سەرۆكایەتی یەكێتی: دەبێت بەر لەهەر كەس گوزەرانی كرێكاران باشبكرێت

.

سەرۆكایەتی یەكێتیی لەرۆژی جەژنی كرێكاراندا تەئكید دەكاتەوە لەوەی  یەكێتی پشتیوانی یەكێتی ریزەكانی گەل و خەباتی كرێكارانە، دەشڵێت: دەبێت بەر لەهەر كەس گوزەرانی كرێكاران باشبكرێت و خۆشمان بە بەشێك لەخەباتان دەزانین، دەستی ماندوبوونتان دەگوشین و بەڵێنی هاوپشتیتان بۆ دووپات دەكەینەوە.

سەرۆكایەتی یەكێتیی بۆ كرێكاران: 

‏‎كرێكاران داهاتوو بونیاد دەنێن، لە پێناو كوردستانێكی گەشەكردوو، دەبێت بەر لەهەر كەس گوزەرانی كرێكاران باشبكرێت ، مافە یاساییەكانیان دەستەبەر بكرێت. لەم بۆنەیەدا دەستی ماندووبوونتان دەگوشین و بەڵێنی هاوپشتیتان بۆ دووپات دەكەینەوە.

‏‎ئێمە لە یەكێتی نیشتمانی كوردستان خۆمان بە بەشێك لەخەباتی ئێوە دەزانین بەو پێیەی هەوێنی هەموو گۆڕانێكن بەرەو نوێگەری و ئاوەدانی هاوشانتان هەنگاودەنێین .

‏‎كرێكاران و رەنجدەران و جوتیاران، بنكەی جەماوەریی فراوانی یەكێتیین ، ئێمەش لەم پێناوەدا هەوڵەكانمان بۆ باشكردنی گوزەرانی كۆمەڵانی خەڵكی كوردستان چڕ كردۆتەوە و بەهیمەتی هەموو لایەك بە جۆش و خرۆشەوە بەڵێنی نوێبوونەوەی یەكێتییمان داوە. 

نوێكردنەوەی یەكێتیش دەبێتە داینەمۆی گۆڕانێك لە كۆمەڵگەدا، ئەمەش بۆ سودی گشتی و لە پێناوی بەرژەوەندییەكانی تەواوی كۆمەڵانی خەڵكدا دەبێت..

‏‎لەم بۆنەیەدا هاوتەریب لەگەڵ دروشمی (كرێكارانی جیهان یەكگرن)، خوازیارین كرێكاران و رەنجدەران و جوتیاران پێكەوە درێژە بە خەباتی مەدەنی و دیموكراسی بدەن لە پێناو بەدیهێنانی مافە پیشەییەكانتان و یەكێتیش داكۆكیكارو پارێزەری بەدیهێنانی خواستەكانتان دەبێت چونكە ، بەیەكێتیی ریزەكانی گەل هەموو سەركەوتنەكان بەدیدێن.. 

لەرۆژی جەژنی كرێكاراندا تەئكید دەكەینەوە لەوەی  یەكێتیی نیشتمانیی كوردستان ، پشتیوانی یەكێتیی ریزەكانی گەل و خەباتی كرێكارانە.. 

دووبارە پیرۆزبێت (1)ی ئایار، رۆژی جیهانی كرێكاران

سەرۆكایەتی یەكێتیی نیشتمانیی كوردستان