لەدەباشان لاهور شێخ جەنگی هاوسەرۆكی یەكێتیی نیشتمانیی كوردستان پێشوازیكرد لە وەفدێكی باڵای كۆمەڵی ئیسلامی كوردستان.

لەدیدارێكدا كە ژمارەیەك لە كارگێڕان و ئەندامانی مەكتەبی سیاسی ئامادەیبوون ، دواین پێشهات و پەرەسەندنە سیاسی و ئەمنی و ئابوورییەكان تاوتوێكران ، هەردوولا هاوڕابوون لەپێشخستنی پەیوەندییەكان و  یەكخستنی هەوڵەكان بەئاڕاستەی كۆدەنگی نیشتمانیی و ئیستقرای سیاسی وئابووری لەهەرێم   لەپێناو دابینكردنی ژیان و گوزەرانی باشتر بۆ كۆمەڵانی خەڵك و دەستەبەركردنی مافەدەستوورییەكانی  هەرێم .

هەر لەدیدارەكەدا یەكێتیی و كۆمەڵی ئیسلامی كوردستان بەپەرۆشەوە خستنەگەڕی هەوڵەكانیان خستەبەرباس بۆدابینكردنی بەشە بوددجەی هەرێم و تەئكیدكرایەوە كە پێویستە حكومەتی هەرێم رێگاچارەی خێرا بۆ دابینكردنی موچەو قوتی هاووڵاتیان بدۆزێتەوە. 

هەروەك جەختیشكرایەوە لەسەر دابەزاندنی دەسەڵات بۆ یەكە كارگێڕییەكان و كارئاسانی زیاتر بۆ پارێزگاو ئیدارەكان بكرێت، لەپێناو خزمەتكردنی  زیاتری هاووڵاتیان و بەرژەوەندی گشتی . 

لەبەرامبەردا وەفدی میوان پیرۆزبایی ئەمیری كۆمەڵی ئیسلامی و كۆمەڵی ئیسلامی كوردستانیان گەیاندە سەرۆكایەتی و سەركردایەتی نوێی یەكێتیی و ستایشی رۆڵی لەمێژینەی سەرۆك مام جەلال _ یان كرد لە بنیادنانی پەیوەندییەكی تەندروست و هاوسەنگ هەروەها سوپاسی لاهور شێخ جەنگی - یشیان كرد كە هاوكارو پشتیوان بووە بۆ پێشخستنی پەیوەندییەكانی نێوانیان.

PUKmedia تایبەت