ڕوونكردنه‌وه‌یه‌ك له‌لیژنه‌ی باڵای ئۆپراسیۆنه‌كانی پارێزگای سلێمانییەوە

.

سه‌باره‌ت به‌ ڕووداوه‌ نه‌خوازاوه‌كه‌ی دوێنێ له‌نێوان تیمێكی چاودێری و پزیشكێک، سه‌رۆكی لیژنه‌ی باڵای ئۆپراسیۆنه‌كانی پارێزگای سلێمانی بۆ به‌ره‌نگاربوونه‌وه‌ی كۆرۆناوه‌ له‌ڕوونكردنه‌وه‌یه‌كدا داوای لێبوردن ده‌كات و هه‌وڵی پزیشكان و كه‌رتی ته‌ندروستی به‌رز ده‌نرخێنێت: ئه‌مه‌ش ده‌قی ڕوونكردنه‌وه‌كه‌:

دوێنێ‌ له‌ یه‌كێك له‌ خاڵه‌كانی پشكنین و چاودێریكردنی قه‌ده‌غه‌كردنی هاتووچۆدا، ڕووداوێكی نه‌خوازراو له‌نێوان به‌ڕێزان تیمێكی چاودێریی‌و پزیشكێكی به‌ڕێزدا ڕوویدا.

هه‌ر دوێنێ‌ له‌گه‌ڵ ڕووداوه‌كه‌دا لیژنه‌ی لێكۆڵینه‌وه‌مان پێكهێنا، له‌ ئه‌نجامی لێكۆڵینه‌وه‌كه‌دا ئه‌وه‌ ڕوونبوویه‌وه‌، كه‌ هه‌ردوو لایه‌نی ئه‌م ڕووداوه‌ دڵسۆزانه‌ له‌ ڕاپه‌ڕاندنی ئه‌ركه‌كانیاندا بوون، كه‌ پاراستنی ته‌ندروستیی گشتیی‌و جێبه‌جێكردنی ڕێنماییه‌كانه‌، هه‌ر هه‌ڵچوون‌و گله‌ییه‌كیش له‌كاتی ڕووداوه‌كه‌دا ڕوویدابێت له‌ ئه‌نجامی په‌رۆشیی‌و پابه‌ندیی‌و شه‌ونخونیی‌و ماندوبوونی هه‌ردوو لایه‌نه‌كه‌وه‌ بووه‌، كه‌ به‌ به‌رده‌وامیی له‌ ئه‌رك‌و خه‌می تێپه‌ڕاندنی په‌تای كۆرۆنادان.

له‌گه‌ڵ ڕێزو سوپاس‌و پێزانینمان بۆ كه‌رتی ته‌ندروستیی‌و ئه‌ركی تیمه‌كانی پشكنین‌و چاودێریكردن، به‌ڵام له‌و سۆنگه‌یه‌وه‌ كه‌ كه‌رتی ته‌ندروستیی و به‌تایبه‌تیی پزیشكه‌ به‌ڕێزه‌كان له‌ ڕیزی یه‌كه‌می به‌ره‌نگاربوونه‌وه‌دان‌و پشكی سه‌ره‌كیی ئه‌ركی پاراستنی ته‌ندروستیی گشتیی، وه‌ك هه‌میشه‌؛ كه‌وته‌ سه‌ر ئه‌م خۆشه‌ویسته‌ خۆنه‌ویستانه‌؛

بۆیه‌ جارێكی تریش داوای لێبوردنی خۆمان پێشكه‌ش به‌م پزیشكه‌ به‌ڕێزه‌و ته‌واوی هاوپیشه‌ به‌ڕێزه‌كانی ده‌كه‌ین، كه‌ به‌ هه‌ڵوێست‌و تێگه‌یشتنی شایه‌نانه‌یان، بوون به‌ به‌شێكی گه‌وره‌ی چاره‌سه‌رو هه‌موو لایه‌ك دڵنیا ده‌كه‌ینه‌وه‌، كه‌ به‌م ئومێدو ئیراده‌و گیانه‌به‌رزه‌وه‌ ده‌توانین یه‌كگرتووانه‌و سه‌ركه‌وتووانه‌ ئه‌م دۆخه‌ تێپه‌ڕێنین.

د.هه‌ڤاڵ ئه‌بوبه‌كر
پارێزگاری سلێمانی
سه‌رۆكی لیژنه‌ی باڵای ئۆپراسیۆنه‌كانی پارێزگای سلێمانی بۆ به‌ره‌نگاربوونه‌وه‌ی كۆرۆنا
٧/ ٤/ ٢٠٢٠
PUKmedia