قوباد تاڵه‌بانی ستایشی جه‌میل هه‌ورامی ده‌كات

.

قوباد تاڵه‌بانی جێگری سه‌‌رۆكی ئه‌‌نجومه‌‌نی وه‌‌زیران له‌نامه‌یه‌ك دا ستایشی هه‌وڵ و خه‌باتی جه‌میل هه‌ورامی تێكۆشه‌ری دێرینی یه‌كێتیی نیشتمانیی كوردستان ده‌كات به‌بۆنه‌ی ده‌ست هه‌ڵگرتنی له‌ لێپرسراوێتی مه‌ڵبه‌ندی 9ی شاره‌زوور،كه‌ ئه‌مه‌ ده‌قه‌كه‌یه‌تی:

هه‌ڤاڵی هێژا، تێكۆشه‌‌ری ماندوونه‌‌ناس كاك جه‌میل هه‌ورامی

سڵاوێكی ھه‌‌ڤاڵانه‌‌ت لێبێت..

له‌ڕێگه‌‌ی ئه‌م نامه‌یه‌وه‌ سوپاس و پێزانینی نه‌بڕاوه‌ت ئاڕاسته‌‌ ده‌‌كه‌‌م له‌پای خه‌بات و قوربانیدان و پشوو درێژی دانه‌بڕاوتان له‌كاروانی كوردایه‌‌تی و یه‌كێتیی نیشتمانیی كوردستان، هه‌ر له‌ قۆناغی پێشمه‌رگایه‌تی و رۆژگاره‌ سه‌خته‌كانی خه‌باتی شاخ و رزگاریخوازییه‌وه‌ تا كاركردنتان له‌سه‌ركردایه‌تی و له‌ به‌‌ڕێوه‌‌بردنی مه‌ڵبه‌ندی شاره‌زوور له‌سه‌رده‌می حوكمڕانی خۆماڵیدا.

شاراوه‌‌ نییه‌‌، ئێوه‌ هاوڕێی دێرین و هاوسه‌نگه‌ر و جێگه‌ متمانه‌ی زۆری رابه‌رمان مام جه‌لال بوون، ھه‌‌ر له‌‌ته‌‌منی لاویه‌‌تییه‌‌وه‌‌ له‌‌به‌‌ر زۆری توانا و لێھاتوویی و دڵسۆزیتان و ئازایه‌‌تیتان له‌‌ سه‌‌نگه‌‌ره‌‌كانی پێشمه‌‌رگایه‌‌تی دژ به‌‌ دووژمنان، ئه‌‌و متمانه‌‌ گه‌‌وره‌‌یه‌‌تان ھه‌‌بووه‌‌، به‌‌نده‌‌ش؛ زۆر له‌توانا و شاره‌زایی و ئه‌زموونی به‌‌ڕێزتان سودمه‌ند بووم چ بۆ كاره‌كانی یه‌كێتیی و چ له‌ به‌جێهێنانی ئه‌ركه‌كانی حكومه‌تی هه‌رێم ھه‌‌میشه‌‌ بۆچوونه‌‌كانی جه‌‌نابتانم به‌‌ھه‌‌ند وه‌‌رگرتووه‌‌ و ھه‌‌رواش ده‌‌بم له‌‌ داھاتوودا.

كاك جه‌میلی هێژا..

به‌‌ڕێزتان له‌مه‌ڵبه‌ندی 9ی شاره‌زوور و ئۆرگانه‌كانی یه‌كێتیدا بمێنن یان نا، هیچ له‌و راستییه‌ ناگۆڕێت كه‌ سه‌رمایه‌یه‌كی به‌نرخ و عه‌قڵێكی دانای ئه‌م كاروانه‌ و یادگارییه‌كی به‌نرخی سه‌رده‌می زێڕینی سه‌‌رۆك مام جه‌لال-ن، هیچ كات و ساتێكیش ده‌ستبه‌ردارتان نابین و هه‌ر خۆتان خاوه‌ن ماڵ و خاوه‌ن قسه‌و ته‌گبیرن، به‌هیواین وه‌ك هه‌مووجار به‌رده‌وام له‌ لوتفی خۆتان به‌هره‌مه‌ندمان بكه‌ن.

ڕێزی زۆری ئه‌م برازایه‌تان قبوڵ بكه‌ن.

قوباد تاڵه‌بانی
جێگری سه‌‌رۆكی ئه‌‌نجومه‌‌نی وه‌‌زیران

PUKmedia