چەند رێنماییەكی نوێ لەژووری ئۆپەراسیۆنەكانی هەڵەبجەوە

.

لەپارێزگای هەڵەبجە رێنمایی نوێی بۆ قەدەغەی هاتووچۆ و دەكراو بەپێی رێنماییەكانیش دەتوانرێت ماركێتەكان و نانەواخانەكان و سەمونخانەكان و سەوزە فرۆشەكان لەژێر چاودێری و رێنماییەكانی تەندروستی و لیژنەهاوبەشەكان كراوە بن. 

دەقی بڕیارە نوێیەكانی پارێزگای هەڵەبجە بۆ قەدەغەی هاتووچۆ 

لەبەر رۆشنایی رێنماییەكانی وەزارەتی ناوخۆ، بەپێی تایبەتمەندیی پارێزگای هەڵەبجە، ئەمڕۆ ئازاد تۆفیق پارێزگاری هەڵەبجە ئەم بڕیار و رێنماییانەی دەركرد..

١ـ ئەمڕۆ لەدوای كاتژمێر ١٢ی نیوەڕۆی ٦ـ٤ـ٢٠٢٠ ئەم رێكارانە دەگرینەبەر:

ا-  رێگەپێدان بۆخزمەتگوزاری گشتی، لەنەخۆشخانە و كاروباری بازرگانی بۆ هێنانی خۆراك و سەردانی جوتیار بۆ كێڵگەو بـاخەكانیان و بەسەركردنەوەی كێڵگە پەلەوەرییەكان و پڕۆژەكانی گاوداری و هەندێك پێداویستی گرنگی تر، ئەوا بەپێی بەیانی ژمارە ٢٢ی وەزارەتی ناوخۆ مامەڵە دەكەین.

ب. ئەم رێگەپێدانە بەپێی پێویست و مەرجدار دەبێت و كاتی گونجاویان بۆدەستنیشان دەكرێت.

ج. هاتوچۆی ئۆتۆمبێل و هاوشێوەكانی بەشێوەیەكی گشتی قەدەغەیەو بەپێی بەیانی ژمارە ١٩ی وەزارەتی ناوخۆ، هەر سەرپێچیەك رووبدات، سەرپێچیكەر رووبەرووی یاسا دەكرێتەوە.

د. هەموو رێگەپێدانێك دەبێت لەژێر چاودێری و رێنمایی دەزگاكانی تەندروستیدا بێت.

٢ـ لەدوای كاتژمێر ١٢ی نیوەڕۆی ٦ـ٤ـ٢٠٢٠ دەتوانرێت ماركێتەكان و نانەواخانەكان و سەمونخانەكان و سەوزە فرۆشەكان لەژێر چاودێری و رێنماییەكانی تەندروستی و لیژنەهاوبەشەكانی قائیمقامیەت كراوە بن.

٣ـ میدیاكاران بەنوسراوی رەسمی دەزگاكانیان رێگە پێدراون.

٤ـ بەپێی ئەو میكانیزمەی بۆدابەشكردنی موچە لەبەڕێوەبەرایەتیەكانی (پەروەردە و شارەوانیەكان و ئاو و زانكۆ) جێبەجێكراوە، ئەوا هاوشێوەی ئەو رێنماییە بەهەماهەنگی لەگەڵ ژووری ئۆپەراسیۆنی پارێزگا، دەبێت پەیڕەو بكرێت.

٥ـ كارە خێرخوازیەكان دەبێت لەژێر سەرپەرشتی یەكە كارگێڕییەكان و لیژنەی تایبەت بەدابەشكردنی خۆراكدا بێت لەپارێزگا.

٦ـ پێویستە هاووڵاتیان و میدیاكاران و رێكخراوەكانی كۆمەڵی مەدەنی زیاتر كار بۆ بڵاوكردنەوەی كلتوری خۆپارێزی و تاك پارێزی بكەن.

ئازاد تۆفیق

سەرۆكی ژووری ئۆپەراسیۆنەكانی پارێزگای هەڵەبجە