زورفی: كۆتایی بە دۆسییەی مەینەتی ئاوارەكان دەهێنین

.

ئەمڕۆ چوارشەممە 1-4-2020 عەدنان زورفی سەرۆك وەزیرانی راسپێردراو لە بارەگای تایبەتی خۆی لە شاری بەغدا چاوی كەوت بەهەریەك لە نۆفل بەها موسی  وەزیری كۆچ و كۆچبەران و مستەفا هیتی سەرۆكی سندوقی ئاوەدانكردنەوە لەعیراق.

لەبەیاننامەیەكدا كە وێنەیەكی دەست PUKmedia كەوتووە، نووسینگەی عەدنان زورفی سەرۆك وەزیرانی راسپێردراو ئاشكرایكردووە، لەدەستپێكی كۆبوونەوەكەداباس لە دوا پرۆسەی نوێكارییلە نەخشەی ناوچەكانی نیشتەجێبوونی ئاوارەكان لەناوخۆ و لەدەرەوە كراوە، هەروەها باس لە رێگرییانەش كراوە كە بوونەتە لەمپەر لەگەڕانەوەی ئاوارەكان بۆ ناوچەكانی خۆیان.

لەمیانەی ئەو باسەدا، هیتی پلان و بەرنامەی سندوقەكەی لە دۆسیەی ئاوەدانكردنەوەی ناوچە وێرانبووەكانی دەستی تیرۆرستانی داعش خستۆتە ڕوو، هەروەها هیتی ئاماژەی بەو پرۆژانەش داوە كە لە پارێزگاكانی دیالە و ئەنبار و سەلاحەددین و نەینەوا جێبەجێ كراون.

لەلایەكی ترەوە، زورفی جەختی كردۆتەوە كە دوای پێكهێنانی حكومەتەكەی، بەوپەڕی بەرپرسیارێتییەوە كاردەكات بۆ كۆتایهێنان بەدۆسیەی ئێش وئازار و مەینەتییەكانی كۆچبەر و ئاوارەكان، هەروەها بنیاتنانەوە و ئاوەدانكردنەوەی ناوچە وێرانبووەكان، مسۆگەر كردنی پێداویستییەكانی پێكەوەژیان و ئاشتی كۆمەڵایەتی.

سەرۆك وەزیرانی راسپێردراو بەڵێنیداوە كە هەڵمەتێكی نیشتمانی گەورە، لەپێناو گەشەدان بە خزمەتگوزارییە سەرەكییەكان و بووژاندنەوەی پرۆژە گرنگەكان لەسەرانسەری عیراقدا ئەنجام بدات.

لەو بارەیەوە، زورفی ئاماژە بەوە دەكات كە باڵوێزانی وڵاتانی ئەنجومەنی ئاسایش و ئەندامانی یەكێتیی ئەوروپاوە بەڵێنیان داوە كە بەشدار و هاوكاردەبن لە پاڵپشتیكردن و پێشكەش كردنی كۆمەكی دارایی بە سندوقی ئاوەدانكردنەوەی عیراق، ئەویش لەپێناو فراوانكردنی پرۆژەكانی خزمەتگوزاری و  گەشەپێدان.

جێی ئاماژەیە، هەر دوێنێ سەرۆك وەزیرانی راسپێردراو چاویكەوتووە بەهەریەك لە نوری دلەیمی وەزیری پلاندانان و سالار محەمەد ئەمین سەرۆكی دەستەی نیشتمانی وەبەرهێنان بەوەكالەت.

PUKmedia نووسینگەی راگەیاندنی سەرۆك وەزیرانی راسپێردراو