كه‌نه‌دا.. هه‌نگاوی نوێ بۆ گه‌نجان و به‌ساڵاچووان داده‌ڕێژێت

.

جۆستن تڕۆدو سه‌رك وه‌زیرانی حكومه‌تی فیدراڵی كه‌نه‌دا له‌ كۆنگره‌ی رۆژنامه‌وانی ڕۆژانه‌یدا به‌ بۆنه‌ی بڵاوبوونه‌وه‌ی ڤایرۆسی كورۆنا ، ڕۆژی 29 ی ئادار 2020 ڕایگه‌یاند بۆ به‌ره‌نگاربوونه‌وه‌ی ڤایرۆسی كورۆنا COVID-19 هه‌نگاوی نوێ بۆ هاوكاریكردنی گه‌نجان و به‌ساڵاچووان به‌ڕێوه‌یه‌ تا بتوانن زیاتر په‌یوه‌ست بن به‌ ڕێنماییه‌كانی خۆپارێزی له‌ ڤایرۆسی كورۆنا و له‌ماڵه‌وه‌ بمێننه‌وه‌ .

ترۆدو له‌ به‌شێكی وته‌كه‌یدا په‌یامێكی ئاراسته‌ی گه‌نجانی كرد و وتی : ئێمه‌ ده‌زانین هێچ شوێنێكی دیكه‌تان نییه‌ تا كاتی پشووی تیا به‌سه‌ر به‌رن ، به‌ڵام ناچارییه‌ و تاكه‌ ڕێگا بۆ پاراستنی ژیانی خۆتان و خێزانه‌كانتان له‌ توشبوون به‌ ڤایرۆسی كورۆنا ته‌نها مانه‌وه‌تانه‌ له‌ماڵه‌وه‌.

 ترۆدۆ له‌ وته‌كه‌یدا ئاشكرایكرد حكومه‌ت بڕی حه‌وت ملیۆن و نیو دۆلار بۆ هاوكاری منداڵانی تالاسیماو و هه‌روه‌ها نۆ ملیۆن دۆلاریش بۆ هاوكاری سیسته‌می كۆمه‌ڵایه‌تی به‌ساڵاچووان ته‌رخانكردووه‌  تا بتوانن زیاتر خۆراك و ده‌رمانی پێویست به‌ده‌ست بهێنن . جگه‌ له‌مانه‌ش سه‌رۆك وه‌زیران به‌ڵێنشی دا بودجه‌ی زیاتر بۆ هاوكاریكردنی كه‌سانی لانه‌وازان و بنكه‌ی شێڵته‌ری ده‌ستدرێژی سیكسی بۆ سه‌ر ژنان و كۆمه‌ڵگه‌ی هاوڵاتیانی ڕه‌سه‌نی وڵات ئیندجینسه‌كان ( هیندی سووره‌كان ).

 جه‌ستن ترۆدۆ سه‌رۆك وه‌زیرانی كه‌نه‌دا كه‌ ماوه‌ی سێ هه‌فته‌یه‌ له‌ حاڵه‌تی كه‌ڕه‌نتیندایه‌ رۆژانه‌ له‌به‌رده‌م ماڵه‌كه‌ی خۆیدا كۆنگره‌یه‌كی رۆژنامه‌وانی سه‌باره‌ت به‌ مه‌ترسی بڵاوبوونه‌وه‌ی زیاتری ڤایرۆسی كورۆنا ده‌به‌ستێت و بڕیار  و هه‌نگاوه‌كانی حكومه‌ت بۆ خۆپارێزی له‌و په‌تایه‌ به‌ هاوڵاتیان ڕاده‌گه‌یه‌نێت ، رۆژی شه‌ممه‌ 28 ی ئادار  له‌ په‌یامێكدا  ڕایگه‌یاند هاتوچۆی هاوڵاتیان له‌ نێوان شاره‌كان به‌ ڕێگه‌ی هێڵه‌كانی شه‌مه‌نده‌فه‌ر و میترو و پاسه‌كان سنووردار ده‌كات ، ترۆدۆ جه‌ختیشی كرده‌وه‌ پێویسته‌ هاوڵاتیان بۆ خۆپاراستن له‌ بڵاوبوونه‌وه‌ی ڤایرۆسی كورۆنا پابه‌ندی ڕێنماییه‌كانی وه‌زاره‌تی ته‌ندرووستی و ئه‌نجوومه‌نی شاره‌وانی هه‌رێمه‌كان و ده‌زگا ته‌ندرووستیه‌كان بن .

جێی ئاماژه‌یه‌ ڕێژه‌ی توشبووانی ڤایرۆسی كورۆنا له‌ وڵاتی كه‌نه‌دا به‌ پێی دوا ئاماری وه‌زاره‌تی ته‌ندرووستی فیدراڵی ژماره‌ی تووشبووان گه‌یشتۆته‌ 6320  حاڵه‌ت له‌وانه‌ش 65  كه‌س گیانیان له‌ده‌ستداوه‌ و 573 كه‌سیش چاره‌سه‌ریان بۆ كراوه‌ . له‌و ژماره‌یه‌ش 1355 توشبوو له‌ هه‌رێمی ئۆنتاریو تۆمار كراوه‌ ، ته‌نها له‌ شاری تورۆنتۆ 512 حاڵه‌تی توشبوو به‌ ڤایرۆسی كورۆنا تۆمار كراوه‌ .

PUKmedia عوسمان عه‌لی/ توڕونتۆ
سه‌رچاوه‌/ ستی نیوز تیڤی