حاڵەتێكی نوێی توشبوون بەكۆرۆنا لەكەركوك تۆمار كرا

.

حاڵەتێكی نوێی توشبوون بە ڤایرۆسی كۆرۆنا لەكەركوك تۆمار كرا كە ژنێكی تەمەن 74 ساڵە و بەهۆی سەردانیكردنەوە ڤایرۆسەكەی بۆ گوازراوەتەوە.

دكتۆر سەباح نامیق سەرۆكی هۆبەی تەندروستی گشتی لە فەرمانگەی تەندروستی كەركوك بە PUKmedia ی راگەیاند: توشبووەكە ژنێكی توركمانی تەمەن 74 ساڵە و ناوی  (ر، ك، ع) و  دانیشتووی ناحیەی تازەی سەر بە كەركوكە.

وتیشی: توشبووەكە پێشتر باری تەندروستی باش نەبووە، بۆ ئەو مەبەستەش چەندین كەس لە خزم و ناسراوەكانی سەردانیان كردووە و هەر لەوانیشەوە تووشی ڤایرۆسەكە بووە.

راشیگەیاند: لە ئێستادا تەندروستی كەركوك بەدوای ئەو كەسانەدا دەگەڕێت كە لەو ماوەیەدا سەردانیانكردووە و باری تەندروستیشی ناجێگیرە.

دكتۆر سەباح نامیق وتیشی: لە ئێستادا توشبووەكە لە نەخۆشخانەی گشتی كەركوكە و بەمەبەستی وەرگرتنی چارەسەر رەوانەی سەنتەری كۆرۆنا لە ناوچەی پیشەسازی كەركوك دەكرێت، بەمەش ژمارەی توشبووان لەو سەنتەرە دەبێتە دوو كەس.

PUKmedia تایبەت