هه‌ولێر.. هاتووچۆی پیاده‌ش قه‌ده‌غه‌ ده‌كرێت

.

له‌ راگه‌یه‌نراوێكی ژووری ئۆپه‌راسیۆنی به‌ره‌نگاربوونه‌وه‌ی ڤایرۆسی كۆرۆنا له‌ پارێزگای هه‌ولێر كه‌ ئه‌مڕۆ 24-3-2020، كۆپییه‌كی ده‌ست PUKmedia كه‌وتووه‌، تێیدا هاتووه‌، دوای بڕیاری وه‌زاره‌تی ناوخۆی حكومه‌تی هه‌رێمی كوردستان به‌ دریژكردنه‌وه‌ی قه‌ده‌غه‌كردنی هاتووچۆ تاوه‌كو 1-4-2020، ئه‌مشه‌و ژووری ئۆپه‌راسیۆنی به‌ره‌نگاربوونه‌وه‌ی ڤایرۆسی كۆرۆنا، به‌سه‌رپه‌رشتی د.فرسه‌ت سۆفی پارێزگاری هه‌ولێر، كۆبوونه‌وه‌یه‌كی ئه‌نجامدا.

كۆبوونه‌وه‌ بڕیاریدا:-
1-جگه‌ له‌قه‌ده‌غه‌كردنی هاتووچۆی ئۆتۆمبێل، هاتوو چۆی پیاده‌ش له‌سه‌ر جه‌م كۆڵانه‌كانی قه‌زا و ناحییه‌كان و ناوه‌ندی شاری هه‌ولێر قه‌ده‌غه‌یه‌، ته‌نها بۆ حاڵه‌تی كڕینی خوراك و پێویستی زۆر زه‌رور نه‌بێ، هیچ كه‌سی تر ڕێگه‌ پێدراو نییه‌، بۆ ئه‌و مه‌به‌سته‌ ته‌واوی هێزه‌ ئه‌منییه‌كان بڵاوه‌ی پێكراوه‌، هه‌ركه‌سێك سه‌رپێچی ئه‌م بڕیاره‌ بكات دووچاری لێپێچینه‌وه‌ی یاسایی ده‌بێته‌وه‌.

2- سه‌رجه‌م ماركێت و سه‌مونخانه‌ و نانه‌واخانه‌كان، ئه‌و شوێنانه‌ی ڕێگه‌ی كاركردنیان پێدراوه‌، پابه‌ندنی ته‌واوی ڕێنماییه‌ ته‌ندروستییه‌كان نه‌بن، لێپێچینه‌وه‌یان له‌گه‌ڵدا ده‌كرێت و داده‌خرێن.

داواكارین له‌ ته‌واوی هاوڵاتیانی سنووری پارێزگای هه‌ولێر، پابه‌ندبن به‌ بڕیاری قه‌ده‌غه‌كردنی هاتووچۆ و ڕێنماییه‌ ته‌ندروستیه‌كان جێ به‌جێ بكه‌ن و له‌ماڵه‌كانیان بمێنه‌وه‌.

                                                                         
ژووری ئۆپه‌راسیۆنی به‌ره‌نگاربوونه‌وه‌ی ڤایرۆسی كۆرۆنای پارێزگای هه‌ولێر

PUKmedia