سەرۆك كۆمار لە بارەی كۆرۆناوە وتارێك ئاڕاستەی گەلانی عیراق دەكات

.

د. بەرھەم ساڵح سەرۆك كۆماری عیراق ، لەبەغدا وتارێكی ئاڕاستەی گەلانی عیراق كرد لە بارەی مەترسییەكانی ڤایرۆسی كۆرۆناوە.

دەقی وتارەكە:

خوشك و برایان و ھاونیشتمانیانم... لە سەرتاسەری عیراق و ھەرێمی كوردستان
سڵاو و سەلامی پەروەردگارتان لێبێت

یادی پیرۆزی شەوڕۆی ( ئیسراو معراج) پێغەمبەری مەزنمان(د.خ) بەدەرفەت دەزانم، هەم پیرۆزبایتان لێ بكەم، هەم لە سەر دواین گۆرانكارییەكان لەگەڵتاندا بدوێم، لە ئێستادا پێكەوە، ڕۆژانێك بەڕێدەكەین كە ڕووبەرووی مەترسی ڤایرۆسی كۆرۆنا بوینەتە‌وە، كە ڕێكخراوی تەندروستی جیهانی بە پەتایەكی سەرتاسەری وەسفی كردووە، بەوەی ڤایرۆسێكی بەڵایە‌ و‌ هەڕەشە لە مرۆڤایەتی دەكات، ئەمەش ئاڵەنگاری خستووەتە بەردەم ژیانی هاونیشتمانیان، بەتایبەتی كەسانی بەتەمەن و ئەوانەی نەخۆشی درێژخایەنیان هەیە.

لە چەند هەفتەی ڕابردوودا، ماڵئاوایمان لەو دۆست و ئازیزانەمان كرد، كە تووشی ئەو ڤایرۆسە بوون و تێداچوون، بە گوێرەی شانەی قەیرانەكان كە حكومەت لە چوارچێوەی فەرمانی دیوانی ژمارە (55) پێكیهێناوە، زۆربەی ئەوانەی تووشی ڤایرۆسەكە بوون، لە دەرەوەی عیراق تووشی بوون، داواكارین لە یەزدان كۆچكردووان بەر ڕەحمەتی خۆی بخات، دڵ و هەستیشمان لای كەسوكار و خۆشەویستانیانە.

جێگەی ‌داخە كە لە چەند ڕۆژی ڕابردوودا بینیمان، كە تۆماری ژمارەی تووشبووان بەشێوەیەكی بەرچاو بەرزبووەتەوە، ئەمەش لە دەرئەنجامی تێكەڵابوون و دروستبوونی قەرەباڵغی لە شوێنە گشتییەكان، گوێنەدانیش بە مەترسی ئەو پەتایە و دەرئەنجامەكانی هاتەكایەوە، سەرەڕای ئەوەی ھەردوو‌ حكومەتی  ئیتحادی و حكومەتی هەرێمی كوردستان و دەسەڵاتی پارێزگاكان، بۆ سنورداركردنی ژمارەی تووشبووان، چەندین ڕێوشوێنی تایبەتیان گرتەبەر؛ هەر لە داخستنی سنورەكان، سەپاندنی قەدەغەی هاتووچۆ، داخستنی شوێنە گشتییەكان، بڵاوكردنەوەی هۆشیاری پاك و خاوێنی، هاوكات مەرجەعیەتە ئاینی و كەسایەتی سیاسی و كۆمەڵایەتی و ڕۆشنبیری و میدیاییەكان، بە سوپاسەوە كاردانەوەیەكی زۆر باشیان هەبووە لە بەرامبەر دۆخەكەدا، لە ئێستاشدا چاوەڕوانی هۆشیاری كۆمەڵایەتی زیاترین لە بارەی پێویستی گرتنەبەری ڕێوشوێنی پێویست لە بەرامبەر ئەم پەتا جیهانییە و لێكەوتە‌كانی، ئەمەش دەبێت بە‌ شێوەیەكی بەرپرسیارانە و لەلایەن هەمووانەوە بەبێ جیاوازی پیادە بكرێت.
خۆشەویستان....
ئەركی نیشتمانیمانە كۆششەكانمان لە ئاستی قەیرانەكەدا بێت‌، دانیش بەودا بنێین كە دۆخە سەختە،‌ ئەگەر پابەندی ڕێنماییەكانی قەدەغەی هاتووچۆ و گوێنەدان بە ڕێوشوێنەكانی‌ خۆپارێزییە تەندروستییەكان نەبین، لەوانەیە (پەنا بەخوا‌) مەترسی زیاتریش دروست بێت، دەبێت‌ دان بەو ڕاستیەشدا بنێین، كەژێرخانی سێكتەری تەندروستیمان لە دۆخێكی باشدا نییە، ئەمەش‌ بەرپرسیاریەتیمان بۆ تێپەڕاندنی ئەم تەنگژەیی ئێستا  زیاتر دەكات.
بۆیە داوا لە تەواوی هێزە كۆمەڵایەتییەكان، خۆشگوزەران و سەرمایەدار‌ و ڕێكخراوە پەیوەندیدارەكان دەكەم، ئەوپەڕی توانایی خۆیان بخەنەگەر بۆ هاوكاری و هەماهەنگی لەگەڵ دامەزراوە فەرمییە پەیوەندیدارەكان، هاوشانی دامەزراوەكانی دەوڵەت، دەستپێشخەری كۆمەڵایەتی بنیادنەر بخەنەڕوو، ئەمەش بۆ بەرەنگاربوونەوەی ئەم قەیرانەی ئێستا، كە بە پشتیوانی خودا بە كەمترین زەرر و زیان لێی دەرباز دەبین.
پێویستە هەموومان  پێكەوە هەماهەنگبین لە دابینكردنی خۆراك و تەندروستی بۆ ئەوانەی پێویستیان پێیەتی‌ لە ڕۆڵەكانی گەلەكەمان، دەزگاكانی ڕاگەیاندنیش ڕۆڵی سەرەكی و كارا بگێڕن لە جۆشدانی دەستپێشخەرییە مرۆییەكان، وەك داواكاری بۆ كەمكردنەوەی كاتی كرێی كرێنشینان و دابینكردنی پێداویستییەكان بۆ خێزانە كەمدەرامەت و ئەوانەی داهاتیان سنوردارە، نابێت برا و خوشكەكانیشمان لە بیر بكەین لە خێوەتگاكاندا كە ساڵانێكە بەرگەی ئێش و ئازاری دەربەدەریان گرتووە، ئەركی دەوڵەتە بیانگێڕێتەوە سەر ماڵ و حاڵی خۆیان.
ئەم دۆخە قورسە وامان لێدەكات وەك گەلێكی خاوەن ویست و جوامێر و ئارامگر، لە بەرامبەر ئاستەنگ و بەڵا و كارەساتە جۆراوجۆرەكان، هاوكار و یەكگرتوو بین،گەلی ئێمە خاوەنی ئەزمونێكی مێژوویی و مرۆیی ڕەسەنە، كە وایكردووە بە درێژایی مێژوو بتوانێت ئاستەنگەكان تێپەڕێنێت و بەردەوامی بە ژیان بدات و بە ویستێكی بەهێزیشەوە پشكداری تێدا بكات.
ئەمرۆشمان هاوتای مێژووە پڕشنگدارەكەمان، گەلەكەمان هەروەك پێشتر سەلماندویەتی، جارێكی دیكەش دەیسەلمێنێت، كە بە بەردەوامی نموونەیەكە لە بەرگەگرتن و تێگەیشتن و قوربانیدان لە بەردەم تەنگەتاوی و ئاڵەنگارییەكاندا.
ئێمەی عیراقی (‌عەرەب و كورد و توركمان‌، موسوڵمان و مەسیحی و ئاین و ئاینزا و تەیافەكان‌، بەرپرس و هاووڵاتی، دەوڵەمەند و هەژار، فەرمانبەر و كرێكار و جوتیار، ژن و پیاو گەنج و منداڵ)، هەموومان لە بەردەم ئەم بەڵا و كارەساتەدا یەك دەستین، جەنگی خۆمان دژ بەو ڤایرۆسە نەگریسە ڕادەگەیەنین و بەسەریدا سەردەكەوین، جگە لە هیواو و ئومێد و متمانەبەخۆبوون، هیچ ڕێگەچارەیەكی دیكەمان‌ لە بەردەمدا نییە.
ئازیزان...
دەبێت ووریایی و ڕێوشوێنەكانمان لە ئاست مەترسیداری پەتاكەدا بێت، نابێت خۆمان تووشی ترس و دڵەڕاوكێ و پشێوی بكەین، دەبێت پابەندی ڕێوشوینەكانی خۆپارێزی و چارەسەربین، هەروەك مەرجەعیەتی باڵا ڕایسپاردەی داوە و لایەنە تەندروستییە تایبمەتمەندەكانیش جەختیان لەسەر كردووەتەوە، با ئەوانەشمان لە بیربێت كە بە ویستی خودا و كۆششی كارمەندانی تەندروستی كە لە پێشەوەی بەرەی جەنگەن، چاكبوونەوە و لە ڤایرۆسەكە ڕزگاریان بووە، ئێستاش لەسەر ئاستی جیهانی، كۆششی ماندوونەناسانە دەكرێت لە پێناو دۆزینەوەی دژە ڤایرۆسەكە و چارەسەری پێویستی پەتاكە.

جارێكی دیكە دووپاتی دەكەمەوە كە پێویستە دووركەوینەوە لە ترس و دڵەڕاوكێ، پابەندبین بە ڕێنماییە تەندروستییەكان، بەلایەنی كەمەوە دوو مەتر لە خەڵكانی دیكەوە دووربین، مانەوە لەماڵەوە و دووركەوتنەوە لە تێكەڵبوون، هەروەها لەكاتی هەستكردن بە دەركەوتنی نیشانە دیارەكانی پەتای كۆرۆنا، سەردانی لایەنە تەندروستییە پەیوەندیدارەكان بكەین.

وەك دەزانین كە ئەم پابەندبوونە ئەركێكی ئاسان نییە، كاریگەری ئابووری و كۆمەڵایەتیش بەسەر ژیانی خەڵك و ئازادی جوڵە و كاركردنیانەوە جێدێڵێت، بەڵام ئەوانەی باسكران، پێداویستی گرنگی قۆناغەكەن و دەبێت دامەزراوەكانی دەوڵەت خۆیانی بۆ ئامادە بكەن،دەبێت هەماهەنگی كۆمەڵایەتی بەرفراوان ڕێكبخرێت بۆ كەمكردنەوەی بارگرانییەكان لەسەر شانی خەڵكانی كەمدەرامەت و كرێنشین و كرێكاران،بەڕێز و نرخاندنشەوە لەو دەست پێشخەرییانە دەڕوانین،كە مەرجەعیەتە ئاینییەكان و ڕێكخراوە فریاگوزارییەكان و كەسایەتییە كۆمەڵایەتییەكان و چالاكوانان لەم بوارەدا پێشكەشیان كردووە.

پشتیوان بەخودا،پێكەوە ئەم قەیرانە تێدەپەڕێنین، ئەویش بە یەكخستنی هەوڵەكانی پێكەوییمان و هەماهەنگی و یارمەتیدانی هێزەكانی ئاسایش، بۆ ئەوەی ئەركەكانی خۆیان بەباشی ڕاپەرێنن، و پشتیوانیكردنی تیم و یەكە تەندروستییەكان تا ئەركەكانیان بەباشی بەڕێوەبەرن، هەروەها لە ڕێگەی دەستبارگرتنی نێوان (دەوڵەمەند و هەژار، بەڕێوەبەر و فەرمانبەر ، باوك و خانەوادەكەی).

خۆشەویستان..

وڵاتەكەمان ڕووبەرووی پەتایەكی جیهانی دەبێتەوە، هاوكات لێكترازانی سیاسی مەترسیدار لە ئارادان،‌ ئەمەش بەهۆی نەبوونی حكومەتێكی خاوەن دەسەڵاتی تەواو، داوا لە ڕۆڵەكانی گەلەكەمان دەكەین یەكڕیزبن،لە پێش هەموو شیانەوە داوا لە هێز و لایەنە‌ سیاسییەكان دەكەین كە یەكڕیز و هەماهەنگبن،لە بەرامبەر ئەو ئاڵەنگارییانەی گەلەكەمان ڕووبەرووی دەبێتەوە بۆ دەربازبوونی وڵات لەو بارگرژییە سیاسییانەی  چەند مانگی ڕابردوو.

بە داخەوە دەڵێین:ئەم دۆخە هەستیارە، پێویستە لەسەر هەمووان بەرپرسیارییەتییەكەی هەڵبگرن، بەرپرسیارییەتییەك كە گەلەكەمان بۆ بەرەنگاربوونەوەی قەیرانەكان خستویەتییە سەرشانی.
سڵاو رێز و ستایش بۆ تیم و یەكە تەندروستییەكان لە پزیشك و پەرستار و دەرمانساز و شارەزاو یاریدەدەر و تەكنیكی لە تەواوی وڵات،كە شەو و ڕۆژیان خستۆتە سەر یەك،بۆ چاودێریكردن و چارەسەركردنی تووشبووان، تاھەرچی زووە پشت بەخودا چاك ببنەوە.

سڵاو خۆشەویستی و شانازیش بۆ هێزەكانی سوپا و ئاسایش و ھێزەكانی پێشمەرگە لەسەرتاسەری وڵات،بۆ تاك بەتاكی ئاسایش و پۆلیس كە بە دڵسۆزی ئەركەكانیان ڕادەپەرێنن بۆ پارێزگاریكردن لە ئاسایشی تەندروستی لە تەواوی گەڕەك و گوند و شارەكان،لە هەمان كاتیشدا، لەسەر سنور و سەنگەرەكانی لە بەگژاچوونەوەی تیرۆر، بەرگری لە ئاسایش و ئارامی و داھاتووی گەلەكەمان دەكەن.

سڵاو بۆ دایكان لە تەواوی عیراق و كوردستان،كە ڕۆڵەكانیان لە ئامێز دەگرن و فێری بنەمای تەندروستیان دەكەن بۆ خۆپارێزیان لە ڤایرۆسەكە،سڵاو لە هەر باوكێك – كە تەنها بۆ كاری زۆر پێویست نەبێت- پێودانگی نەچوونە دەرەوە لە ماڵ ڕێكدەخات بۆ كەمكردنەوەی ترس و دڵەڕاوكێی خانەوادەكەی.

سڵاو بۆ هەموو گەنجان لە كچان و كوڕان،كە پابەندن بە ڕێنماییە تەندروستییەكان،كە لە ڕێگەی تۆڕی كۆمەڵایەتییەكانەوە هۆشیاری بڵاو دەكەنەوە و دەستپێشخەری باش دەكەن بۆ یارمەتیدانی خاوەن پێداویستییەكان،ئە‌و دەنگۆ و پروپاگەندانەش‌ ڕەتدەكەنەوە كە ترس و خەمۆكی لە نێو هاوونیشتمانیاندا بڵاو دەكاتەوە،

گەلەكەمان بە هۆشیاری و ژیری و یەكڕیزی و زانست و ڕەسەنی و دان بەخۆداگرییەكەی،بەسەر پەتای كۆرۆنا سەردەكەوێت،هەروەك چۆن سەركەوت بەسەر پەتای تیرۆردا،‌پشتیوان بەخودا سەردەكەوێت بەسەر پەتای گەندەڵی و دابەشكاری و خراپ بەكارهێنانی بەڕێوەبردن و چەكی لەدەست دەرچوو.

(فَإِنَّ مَعَ الْعُسْڕ یُسْرًا - إِنَّ مَعَ الْعُسْڕ یُسْرًا)
خودا پارێزەر و چاودێرتان بێت.. تەندروستی و سەلامەتی بۆ ئێوە و خانەوادە و خۆشەویستانتان.
شیفا و زوو چاكبوونەوەش بۆ نەخۆش و تووشبووان
بەزەیی و ڕەحمەت و نەمری بۆ شەهیدان
دووبارە سڵاوی خودای گەورەتان لێبێت

PUKmedia نووسینگەی راگەیاندنی سەرۆك كۆماری عیراق