قوباد تاڵەبانی: دەنگی گەلی كوردستان هەڵگری سەروەرییەكانی راپەڕینە

.

بەبۆنەی یادی 41 ساڵەی دامەزراندنی ئێزگەی دەنگی گەلی كوردستانەوە، قوباد تاڵەبانی جێگری سە‌رۆكی ئە‌نجومە‌نی وە‌زیران بروسكەیەكی پیرۆزبایی ئاڕاستەی بەڕێوبە‌ر و كارمەندانی ئێزگەكە دەكات كە ئەمە دەقەكەیەتی...

بەڕێوبە‌ر و كارمەندانی ئێزگەی دەنگی گەلی كوردستان

سڵاوتان لێبێت..

هاوكات لەگەڵ نەورۆزی نەتەوەیی گەلی كورد، ساڵیادی ئێزگە دەنگ زوڵاڵەكەی شۆڕشی نوێی كوردستان دەبێتەوە میوانمان و ئەم بۆنە جوانە بەرز و پیرۆز رادەگرین.

ئەم ئێزگەیە بۆ ئێمە و لای هەموو تاكێكی كورد، زیاترە لەرادیۆیەك و هۆكارێكی راگەیاندن، چونكە هەڵگری یادەوەری نەبەردییەكانی هێزی پێشمەرگەو سەروەرییەكانی راپەڕینە مەزنەكەیە لە ساڵی 1991، لەپاش ئەوەش بووە مینبەری هاندانی ژیانەوە و بووژاندنەوەی كوردستان و میوانێكی رۆح سووكی هەموو ماڵەكانمان.

دەنگی گەلی كوردستان، سەنگەرێكی قایمی بەرگری بوو بەرامبەر دوژمنانی كورد لەرۆژگارەكانی قۆناغی خەباتی رزگاریخوازیدا، قوتابخانەی وشە و فەرهەنگی زمانی كوردی بوو لەسەردەمی تەعریب و ستەمكاریی بەعسدا، كوانوی جۆشدانی خەبات و قوتابخانەی پێگەیاندن و تێگەیاندنی كادیرانی كاروانەكەی یەكێتی و فێرخوازەكانی  ھە‌ڤاڵ و رابە‌رمان مام جەلال بووە لە مێژووی 41 ساڵەی تەمەنیدا.

 ئەركی "دەنگی گەلی كوردستان" لەم قۆناغەدا جگە لەپاراستنی سەروەرییەكان، پەرەپێدان و نوێگەرییە لەبەر رۆشنایی پێشكەوتنەكانی دنیای نوێی میدیا و گەیاندن، بۆ ئەوەی هەمیشە لەپێشەنگ و بەخششدا بمێنێتەوە بەهەمان ئاست و ناوبانگی جاران.

جارێكیتر ئەم ساڵیادە پیرۆز بێت، ئەم بۆنەیەش بەدەرفەت دەزانم دەستی ماندوبوونی ستافە كارامەكەی بگوشم و سڵاو بۆ خەباتگێڕانی مێژووە پڕ سەروەرییەكەی بنێرم، كە هەمیشە بە "ئێرە دەنگی گەلی كوردستانە" شاد و سەربەرز و ئاسوودەیان دەكردین و مژدەی سەركەوتنیان پێ دەگەیاندین.

قوباد تاڵەبانی
جێگری سە‌رۆكی ئە‌نجومە‌نی وە‌زیران

PUKmedia تایبەت