وه‌زاره‌تی پێشمه‌رگه‌ راگه‌یه‌نراوێك له‌باره‌ی مووچه‌ بڵاوده‌كاته‌وه‌

.

وه‌زاره‌تی پێشمه‌رگه‌ی حكومه‌تی هه‌رێمی كوردستان داوای دۆزینه‌وه‌ی میكانیزمێك بۆ دابه‌شكردنی مووچه‌ له‌زووترین كاتدا ده‌كات.

ده‌قی راگه‌یه‌نراوه‌كه‌..
راگه‌یه‌ندراوێك له‌وه‌زاره‌تی پێشمه‌رگه‌وه‌
ئێمه‌ له‌وه‌زاره‌تی پێشمه‌رگه‌ دووپاتی ده‌كه‌ینه‌وه‌، كه‌ به‌باشی له‌دۆخ و گوزه‌رانی هێزه‌كانی پێشمه‌رگه‌ تێده‌گه‌ین و به‌سنگفراوانیه‌وه‌ پێشوازی  له‌نیگه‌رانی و سه‌رنجه‌كانیان ده‌كه‌ین له‌سه‌ر ماف و شایسته‌ داراییه‌كانیان، به‌ڵام به‌توندی له‌به‌رامبه‌ر هه‌ر موزایه‌ده‌و ناوزڕاندنێك ده‌وستینه‌وه‌ كه‌ له‌رێگه‌ی ئه‌و پرسه‌وه‌ به‌وه‌زاره‌تی پێشمه‌رگه‌ و هێزه‌كانمان بكرێت، روونه‌ كه‌ رێككاره‌كانی لیژنه‌ی باڵای حكومه‌ت بۆ رووبه‌ڕووبونه‌وه‌ی په‌تای كۆڕۆنا و رێنمایه‌كانی وه‌زاره‌تی ته‌ندروستی، بۆته‌ هۆكاری دابه‌ش نه‌كردنی مووچه‌ی وه‌زاره‌تی پێشمه‌رگه‌، حكومه‌تی هه‌رێمی كوردستان، له‌رێگه‌ی وه‌زاره‌تی پێشمه‌رگه‌ و وه‌زاره‌تی داراییه‌وه‌ له‌هه‌وڵی دۆزینه‌وه‌ی رێگا چاره‌یه‌كی گونجاون به‌ دۆزینه‌وه‌ی میكانیزمێك بۆ دابه‌شكردنی مووچه‌ له‌زووترین كاتدا، به‌جۆرێك زیان نه‌گه‌یه‌نێت به‌پڕۆسه‌ی كه‌ره‌نتینه‌ی گشتیی وته‌ندروستی هه‌مووان .
له‌سۆنگه‌ی به‌رپرسیاریێتی نیشتمانیی و ئه‌خلاقیمانه‌وه‌، پابه‌ندی خۆمان به‌و رێككارو بڕیارانه‌ دووپاتكردۆته‌وه‌، هه‌ر كه‌س و لایه‌نێكیش ته‌شهیر و ناوزڕاندن بكا و هانی پێشمه‌رگه‌ بدات له‌گرتنه‌به‌ری رێككاری پێچه‌وانه‌ی یاساو پره‌نسیپه‌كانی سه‌ربازی، رووبه‌ڕوی دادگا و یاسایان ده‌كه‌ینه‌وه‌.

وه‌زاره‌تی پێشمه‌رگه‌ی حكومه‌تی هه‌رێمی كوردستان
١٥ی ئازاری ٢٠٢٠
PUKmedia تایبه‌ت