وەزیری ناوخۆی هەرێم: هیچ حاڵەتێكی كۆرۆنا تۆمار نەكراوە

.

وەزیری ناوخۆی هەرێم رایگەیاند، هیچ حاڵەتێكی تووشبوون بە ڤایرۆسی كۆرۆنا لە هەرێم تۆمار نەكراوە و هاووڵاتیان دڵنیا دەكەیەنەوە ئەو رێوشوێنانەی كە دەگیرێنەبەر بۆ خۆپاراستنە، داواشی لە هاووڵاتیان كرد لە ئێستادا سەردانی كەركوك و نەجەف نەكەن.

ئەمشەو 26-2-2020، وەزیری ناوخۆی هەرێم و وەزیری تەندروستی هەرێم كۆنگرەیەكی رۆژنامەوانیان لەبارەی ڤایرۆسی كۆرۆناوە ئەنجامدا و د. رێبەر ئەحمەد وەزیری ناوخۆی هەرێم رایگەیاند: 536 كەس لە خاڵە سنوورییەكانی هەرێمەوە گەڕاونەتەوە هەرێم و ناو ناونیشانی سەرجەمیان لەلای ئێمە هەیە و بەدواداچوون بۆ باری تەندروستیان دەكەین،

هاوكات داواشیان لێ دەكەین بۆ بەرژەوەندی خۆیان و خێزانەكانیان رێوشوێنە تەندروستییەكان بگرنەبەر.

داواشی لە هاووڵاتیان كرد لە ئێستادا سەردانی شارەكانی كەركوك و نەجەف نەكەن.

د. رێبەر ئەحمەد وەزیری ناوخۆی هەرێم وتیشی: هیچ حاڵەتێكی كۆرۆنا لە هەرێمی كوردستان تۆمار نەكراوە و هاووڵاتیان دڵنیا دەكەیەنەوە ئەو رێوشوێنانەی كە دەگیرێنەبەر سەرجەمیان بۆ خۆپاراستنە لە ڤایرۆسی كۆرۆنا.

جەختیشیكردەوە: ئەوەی لەتوانایاندابێت لەڕووی ماددی و مرۆییەوە دەیخەینەگەڕ بۆ رووبەڕووبوونەوەی ڤایرۆسەكە و كەمتەرخەمی لە هیچ لێپرسراوێك قبوڵناكرێت و لەو رووەشەوە دەسەڵاتی تەواو دراوە بەسەرجەم پارێزگارەكان.

هاوكات داوای لێبووردنیشی لەو هاووڵاتیانە كرد كە لە ئێستادا خراونەتە ژێر چاودێرییە و وتی: ئەو دۆخە لەدەرەوەی خواستی ئێمەیە و بۆ بەرژەوەندی گشتییە.

هاوكات دكتۆر سامان حسێن بەرزنجی وەزیری تەندروستی هەرێم رایگەیاند: لە ئێستادا هەزار و 734 كەس لە ئێران گەڕاونەتەوە بۆ هەرێم و لەژێر چاودێریدان، هاوكات بە قەبارەی سەد و 70 قەرەوێڵە لە 12 شوێنی تایبەتی نەخۆشخانەكانی هەرێم بۆ چاودێری ئەو كەسانە تەرخانكراوە كە گومانی ڤایرۆسەكەیان لێبكرێت.

راشیگەیاند: لەماوەی 24 سەعاتی رابردوودا 14 كەس پشكنینی ڤایرۆسەكەیان بۆ كراوە و لەو رێژەیەش خۆشبەختانە 11 كەسیان تووشی ڤایرۆسەكە نەبوون و سێ كەسەكەی دیكەش تا ئێستا ئەنجامی پشكنینەكانیان دەرنەچووە.

وەزیری تەندروستی وتیشی: لە ئەمڕۆوە 14 تیمی پزیشكی پشكنین دانراون بە ئامێری تایبەت پشكنین ئەنجامدەدەن.

PUKmedia تایبەت