قوباد تاڵە‌بانی ئیدانەی پەلاماره تیرۆرستییەكەی گوندی چەخماخە دەكات

.

قوباد تاڵە‌بانی جێگری سە‌رۆكی ئە‌نجومە‌نی وە‌زیران، لە راگەیەنراوێكدا شەهیدكردنی چوار هاووڵاتی گوندی چەخماخە و برینداركردنی ژمارەیەكیتر، بەتوندی ئیدانەو شەرمەزار دەكات و دەڵێت، سەلامەتی و ئاسایشی هاووڵاتیانی كورد و پێكهاتە جۆراوجۆرەكانیتری ناوچەكە لەئەستۆی هێزە ئەمنییە عیراقییەكانە و ئێمەش هەرچیمان پێ بكرێت درێغی ناكەین.

دەقی راگەیەنراوەكە:

بە‌ڕێزان كە‌سوكاری سە‌ربە‌رزی شە‌ھیدانی گوندی چە‌خماخە‌

هاووڵاتیانی گوندی چەخماخەی خۆشەویست.. 

هەواڵی شەهیدكردنی چوار هاووڵاتی كوردی گوندی چەخماخەی سەر بە قەزای دووبزی پارێزگای كەركوك و برینداركردنی ژمارەیەكیتر، بەتوندی ئیدانەو شەرمەزار دەكەین. 

ئەم پیشهاتە ئەمنیانە كە لەدوای شكستی سەربازیی داعشەوە ناوبەناو دژ بەخەڵكی ناوچە كوردستانییەكانی سنووری كەركوك و نەینەواو دیالە دووبارە دەبێتەوە، ئاماژەیەكی روونە لەسەر مەترسی پاشماوە و ژێرخانی ئەم رێكخراوە تیرۆریستییە كە كوشتن و بڕینی وەحشیگەرانە یەكێك لەئامانج و شێوازەكانی كاركردنییەتی و پێویستی بەچاوكراوەیی و پلان و ئامادەسازیی بەردەوام و تۆكمە هەیە بۆ بەرەنگاربوونەوەی. 

سەلامەتی و ئاسایشی هاووڵاتیانی كورد و پێكهاتە جۆراوجۆرەكانیتری ناوچە گەرمەكان لەئەستۆی هێزە ئەمنییە عیراقییەكانە و ئێمە لە حكومەتی هەرێمی كوردستان هەرچیمان پێ بكرێت بۆ هاوئاهەنگی و كێوماڵكردن و زانیاری گۆڕینەوە بۆ پاراستنی گیانی خەڵكی ئەو ناوچانە درێغی ناكەین و جارێكیتر بیری هەموو لایەكی دەخەینەوە كە تیرۆر هێشتا مەترسییەكی جددییە و نابێت هیچ كات فەرامۆش بكرێت یا بەكەم بگیرێت و ئەو بۆشاییە ئەمنییەشی لەو ناوچانە هەیە پێویستی بەپڕكردنەوە و چارەسەركردن هەیە بۆ ئەوەی سنورێك بۆ ئەم كارەساتانە دابنرێت. 

درود بۆ گیانی شەهیدانی گوندی چەخماخە و سەرجەم شەهیدانیتری كوردستان.

انا للە‌ وانا الیە‌ راجعون

قوباد تاڵە‌بانی

جێگری سە‌رۆكی ئە‌نجومە‌نی وە‌زیران

PUKmedia راگەیاندنی جێگری سە‌رۆك وە‌زیران