كۆسرەت رەسوڵ سەفەر دەكات و كۆبوونەوەی سەركردایەتیش رادەگیرێت

.

لەسەر داوای كۆسرەت رەسوڵ عەلی كۆبوونەوەی ئەمڕۆی ئەنجومەنی سەركردایەتی یەكێتی دواخرا و سەرپەرشتیاری كۆبوونەوەكەش دەڵێت، هەڤاڵ كۆسرەت رسوڵ سەفەرێكی چەند رۆژی دەكات و تا ئەوكاتەی دەگەڕێتەوە كۆبوونەوەكان دوادەخرێن.

ئەمڕۆ 15-2-2020، ئەنجومەنی سەركردایەتی یەكێتی بە بەشداری كۆسرەت رەسوڵ عەلی سەرۆكی ئەنجومەنی باڵای سیاسی و بەرژەوەندی یەكێتی كۆبووەوە .

لە كۆبوونەوەكەدا تەئكید لەسەر یەكێتی ریزەكانی یەكێتیی نیشتمانیی كوردستان لە پتەوكردنی یەكێتی ناو یەكێتی كرایەوە.

ئەنجومەنی سەركردایەتی زۆربەی زۆری بڕگە و ماددەكانی پەیڕەوی لە كۆبوونەوەكانیدا پەسەند كردووە و لە چەند رۆژی داهاتووشدا كۆی پەیڕەوەكە بە یەك پاكێج لە دوای دەنگدان لەسەری پەسەند دەكرێت بە ماددەی تایبەت بە ئەنجومەنی باڵای سیاسییەوە كە بە راوێژی نێوان ئەنجومەنی سەركردایەتی و ئەنجومەنی باڵای یەكێتی یەكلا دەكرێتەوە.

دوای پەسەند كردنی كۆی پەیڕەوكە دەچێتە بواری جێبەجێ كردنەوە و دەزگا و ئۆرگانەكانی یەكێتی لەسەر ئەو بنەمایە رێكدەخرێنەوە.

مستەفا چاوڕەش ئەندامی ئەنجومەنی سەركردایەتی یەكێتی و سەرپەرشتیاری كۆبوونەوەكان تایبەت بە PUKmedia ی راگەیاند: كەمێك پیش ئێستا لەسەر داوای كۆسرەت رەسوڵ عەلی سەرۆكی ئەنجومەنی باڵای سیاسی و بەرژەوەندی یەكێتی كۆبوونەوەی ئەنجومەنی سەركردایەتی یەكێتی كۆتایی هات.

وتیشی: دوای گەڕانەوەی هەڤاڵ كۆسرەت رەسوڵ كۆبوونەوەكانی ئەنجومەنەكە بۆ رایی كردنی ئەركە حزبییەكان و هەماهەنگی ئۆرگانەكان دەستپێدەكاتەوە.

چەند رۆژێكە ئەنجومەنی سەركردایەتی یەكێتیی نیشتمانیی كوردستان لە كۆبوونەوەی بەردەوامدایە بۆ گفتوگۆكردن و پەسەندكردنی هەمواری پەیڕەوی ناوخۆی حزب و لە ئێستاشدا زۆربەی ماددەكانی پەیڕەوی ناوخۆی هەموار كراو پەسەند كراون و تەنها یەك ماددە ماوە پەسەند بكرێت لەگەڵ دەنگدان لەسەر كۆی پەیڕەوەكە بەیەك پاكێج.

PUKmedia ژینەر محەمەد