کۆمیتەی هونەرمەندانی چوار پارچەی کوردستان پێکدەهێنرێت

.

پاشنیوەڕۆی ئەمڕۆ لە شاری سلێمانی ژمارەیەک لە هونەرمەندانی سلێمانی و نوێنەری هونەرمەندانی کوردستانی باکور و رۆژئاوا کۆبونەوەو گفتوگۆ لەبارەی پێکهێنانی کۆمیتەی هونەرمەندانی هەر چوار پارچەی کوردستان کرا بۆ ئەنجامدانی کاری هاوبەشی هونەری، دور لە بنەمای حزبایەتی و ناوچەگەرێتی.

لە بارەی کۆبونەوەکەوە خانمە هونەرمەند شیلان عوسمان لە لێدوانێکیدا بۆ PUKmedia وتی: پاشنیوەڕۆی ئەمڕۆ ١٠-٢-٢٠٢٠ ژمارەیەک هونەرمەندی شاری سلێمانی بە بەشداری هونەرمەندان دیار دەرسیم هونەرمەندی گەورەی کوردستانی باکور و خەلیل غەمگین هونەرمەندی گەورەی کوردستانی رۆژئاوا بە بەشداری کەناڵەکانی راگەیاندن کۆبونەوەیەکمان ئەنجامداو ئەنجامی کۆبونەوەکەش بۆ رای گشتی خرایەروو.

وتیشی: لە کۆبونەوەکەدا گفتوگۆ کرا لەبارەی پێکهێنانی کۆمیتەیەکی هونەرمەندانی هەر چوار پارچەی کوردستان، بۆ بەئەنجامگەیاندنی کاری هونەری هاوبەش، بەمەبەستی دورکەوتنەوە لە کاریگەرییەکانی حزب و ناوچەگەرێتی لەسەر هونەر و هونەرمەندان.

شیلان عوسمان ئاماژەی بەوەشکرد، کە پێکهێنانی ئەم کۆمیتەیە مەبەست لێی ئەنجامدانی کاری هاوبەشی هونەرمەندانەو پێشکەشکردنی بەرهەمە هونەرییەکانیانە بە هەرچوار پارچە، بەمەبەستی خزمەتکردنی میلەت و بەکارهێنانی داهاتی کۆنسێرتەکان بۆ کاری خێرخوازی.

ئەوەشی ئاشکراکرد، وابڕیارە کۆنسێرتێک بەبەشداری هونەرمەندانی هەر چوار پارچە رێکبخرێت و لە سەرجەم شارەکانی هەرێم و پارچەکانی تری کوردستان نمایش بکرێت.

ئەم کۆبونەوەیە لەلایەن رێکخراوی نوێگەرەوە رێکخراوە.

PUKmedia هاژە باست