بڕی بەرهەمە هاوردەكراوەكان دیاریدەكرێن

.

بەمەبەستی راگرتنی هاوسەنگی و زیاد نەبوونی نرخ، هاوردەی بەروبوومی پەلەوەری دیاری ده‌كرێت و جێگری بەرێوەبەری كشتوكاڵی سلێمانیش رایدەگەیەنێت بەمەرجەكانی ڤێتەنەری و تەندروستی بەرهەمەكان هاوردە دەكرێت. 

ئەمڕۆ 26ی كانونی دووەمی 2020، لە دیوانی قائیمقامیەت ئاوات محەمەد قائیمقامی سلێمانی لەگەڵ لیژنەی دیاریكردنی بەروبومی ئاژەڵی و پەلەوەری پارێزگای سلێمانی كۆبوویەوە، پاش هەڵسەنگاندن بۆ ئاستی بەرهەمهێنانی بەروبومی ناوخۆیی، بڕیاردرا پێداچونەوە بەبڕی ئەو بەروبوم و پێداویستیانەدا بكرێت كە هاوردەی پارێزگای سلێمانی دەكرێت.

لە دوای كۆبونەوەكەش رزگار حەمەد خدر جێگری بەڕێوەبەری بەڕێوەبەرایەتی كشتوكاڵی سلێمانی وتی: بەلەبەرچاووگرتنی هاوسەنگی راگرتن لە نێوان بەرهەمی ناوخۆ و هاوردەكراو، هەروەها بەرز نەبوونەوەی نرخی بەرهەمی پەلەوەر لەسەر هاووڵاتیان، لیژنەكە بڕیاری لەسەر بڕی بەرهەمی هاوردەكراو داوە بۆ مانگی شوباتی داهاتوو.

وتیشی: لەكۆبونەوەكەدا جەخت لەسەر پەرەپێدانی بەروبومی ناوخۆ كراوەتەوە بۆ ئەوەی لەگەڵ بەروبوومە هاوردەكراوەكاندا هاوسەنگ بێت. 

 رزگار محمد ئاماژەی بەوەشكرد: بڕی ئەو بەروبومانەی لە مانگی شوباتدا هاوردە دەكرێن بریتی یە لە 500 تۆن ماسی، 500 تۆن مریشكی بەستوو بەپێی پشكنینی تەندروستی و 500 تۆن گۆشتی سورو 10 هەزار سەر ئاژەڵی زیندوو.

PUKmedia راگەیاندنی قائیمقامیەتی سلێمانی