په‌رله‌مانتاران به‌م مووچه‌یه‌ خانه‌نشین ده‌كرێن

.

په‌رله‌مانی كوردستان به‌ده‌نگی 89 په‌رله‌مانتاری ئاماده‌بوو پرۆژه‌ یاسای چاكسازی له‌ خانه‌نشینی و مووچه‌ و ده‌رماڵه‌و به‌خشین و ئیمتیازاته‌كانی دیكه‌ی په‌سه‌ند كردو كه‌مترین مووچه‌ی خانه‌نشینی په‌رله‌مانتارانیش ملیۆنێك و 600 هه‌زار دینار ده‌بێت.

له‌كۆنگره‌یه‌كی رۆژنامه‌وانیدا فراكسیۆنی یه‌كێتی دوای په‌سه‌ندكردنی پرۆژه‌ یاساكه‌ ئاماژه‌یان به‌وه‌كرد، كۆبوونه‌وه‌كه‌ به‌باشی به‌ڕێوه‌چووه‌و به‌ په‌سه‌ندكردنی ئه‌و پرۆژه‌یه‌ش بڕه‌ پاره‌یه‌كی باش بۆ حكومه‌ت ده‌گه‌ڕێته‌وه‌.

 ئه‌وه‌شیان خسته‌ڕوو: بۆ یه‌كه‌مجاره‌ له‌ په‌رله‌مانه‌وه‌ مووچه‌ی خانه‌نشینی په‌رله‌مانتاران و پله‌باڵاكان كه‌مده‌كرێته‌وه‌و ئه‌وه‌ش دادپه‌روه‌ری له‌ مووچه‌دا به‌رجه‌سته‌ ده‌كات، بۆیه‌ وه‌ك فراكسیۆنی یه‌كێتی پشتیوانی پرۆژه‌كه‌ بووین.

له‌باره‌ی مووچه‌ی خانه‌شنی په‌رله‌مانتارن و پله‌باڵاكانیشه‌وه‌ ئه‌وه‌یان خسته‌ڕوو، پێشتر په‌رله‌مانتاران دوای ته‌واوبوونی ئه‌ركه‌كه‌یان به‌بێ هه‌ژماری ته‌مه‌ن و بڕوانامه‌ به‌ 80% ی مووچه‌ و ده‌رماڵه‌كانیان خانه‌نشین ده‌كران، به‌ڵام به‌پێی پرۆژه‌ نوێیه‌كه‌ به‌رزترین خانه‌شینی په‌رله‌مانتاران له‌ 50% ده‌بێت و كه‌مترینیش 25% ده‌بێت، بۆ نموونه‌ ئه‌گه‌ر په‌رله‌مانتارێك پێشتر خزمه‌تی نه‌بووبێت و به‌ 6 ملیۆن و 400 هه‌زار دینار خانه‌نشین بووبێت، له‌ئێستادا به‌ ملیۆنێك و 600 هه‌زار دینار خانه‌نشین ده‌كرێت، هه‌روه‌ها بڕوانامه‌و خزمه‌ت ئاستی مووچه‌كه‌ به‌رزده‌كاته‌وه‌، كه‌ ئه‌وه‌ش دادپه‌روه‌رییه‌كی باش دێنێته‌ ئاراوه‌.

PUKmedia تایبه‌ت