كۆسره‌ت ره‌سوڵ: عیراق نه‌كرێته‌ گۆڕه‌پانی ململانێكان

.

ئێوارەی ئەمڕۆ ١٤-١-٢٠٢٠ لەشاری سلێمانی كۆسرەت رەسول عەلی سەرۆكی ئەنجومەنی باڵای سیاسی و بەرژەوەندی یەكێتیی نیشتمانیی كوردستان پێشوازی لە ئیرەج مەسجدی باڵیۆزی ئێران لە عیراق، كرد.

لە دیدارەكەدا كە حاكم قادر حەمەجان ئەندامی ئەنجومەنی باڵای سیاسی و بەرژەوەندی یەكێتی نیشتمانی كوردستان ئامادەی بوو، گفتوگۆكرا لەبارەی دۆخی عێراق و ناوچەكەو پەیوەندییەكانی نێوان هەرێم و بەغدا.

لە بەشێكی تری كۆبوونەوەكەداو پەیوەست بە كێشەو ململانێكان، كۆسرەت ڕەسول جەختی لە پەرەپێدانی گفتوگۆی نێوان لایەنەكان كردەوەو هیوای خواست كێشەكان بە گفتوگۆ چارەسەر بكرێن و عيراق نەكرێتە گۆڕەپانی ململانێكان.

سەرۆكی ئەنجومەنی باڵای سیاسی و بەرژەوەندی یەكێتی نیشتمانی كوردستان و باڵیۆزی ئێران لە عێراق بەوردی باسیان لە ئایندەی عيراق و چۆنیەتی چارەسەركردنی بنەڕەتی كێشەكان كردەوەو دووپاتیان كردەوە كە پێویستە هەماهەنگی تەواو هەبێ لەنێوان لایەنەكان.

پەیوەندییەكانی نێوان هەرێمی كوردستان و كۆماری ئیسلامی ئێران تەوەرێكی تری گفتوگۆكان بوو، كۆسرەت ڕەسول وێڕای جەخت كردنەوەلە پەیوەندییەكان و پەرەپێدانی سوپاسی ئێران و سەرجەم وڵاتانی هاوپەیمانی نێودەوڵەتی كرد كە لە جەنگی بەرەنگاربوونەوەی تیرۆرهاوكاری كوردیان كردووە.

PUKmedia  تایبەت