د. به‌رهه‌م له‌نێوان خواستی شه‌قام و لایه‌نه‌كاندا

.

به‌ سلوكیاتی عادل عه‌بدولمه‌هدی سه‌رۆك وه‌زیرانی ده‌ستله‌كاركێشراوی عیراق له‌ به‌رێوه‌بردن و ده‌وڵه‌تدارییدا ده‌وترا، كه‌سێكی نه‌رمونیانه‌ و خه‌سڵه‌تی ئاڵانگارییه‌كانی نییه‌، بێگومان ئه‌گه‌ر خاڵی لاوازی كه‌سێك له‌ هه‌ره‌می ده‌سه‌ڵاتدا  میانره‌ویی بێ ، ئه‌وا پێچه‌وانه‌كه‌ی په‌سه‌نده‌ كه‌ توندره‌و و ده‌مارگیربێ له‌ ده‌ركردنی بریاره‌كاندا ، دوڵه‌تی عیراق  ته‌ركیبه‌یه‌كی له‌یه‌ك جیاوازی هه‌یه‌ بۆیه‌  پێویستی به‌ ده‌ستێكه‌ زۆر به‌ ئامانه‌ته‌وه‌ مامه‌ڵه‌ له‌گه‌ڵ كێشه‌كاندا بكات  و بۆچونه‌ جیاوازه‌كان له‌یه‌ك نزیك بكاته‌وه‌ ، چونكه‌ هیچ كاتێك باجی زیانی ئاڵۆزییه‌ناوخۆییه‌كان له‌ده‌ره‌وه‌ نه‌دراوه‌ به‌ڵكو هه‌ر گه‌ل و میلله‌ته‌ داویه‌تی  و ده‌رئه‌نجامه‌كه‌شی داته‌پینی ژێرخانی ئابووری و لێكترازانی سیاسیی و كۆمه‌ڵایه‌تیی لێكه‌وتۆته‌وه‌، له‌ولاشه‌وه‌ ده‌ستی ده‌ره‌كی له‌ دووره‌وه‌ ته‌ماشی سینارۆی مه‌شهه‌ده‌كه‌ ده‌كات  كه‌ خۆی سیناریستی بوه‌. له‌و قه‌یرانه‌ی كه‌ له‌دوای ده‌ستله‌كاركێشانه‌وه‌كه‌ی عه‌بدولمه‌هدی سه‌ری هه‌ڵدا زۆر كه‌س و لایه‌ن  به‌ خودی عه‌بدولمه‌هدیشیه‌وه‌ جاك ده‌یانزانی كه‌ ده‌ستنیاشانكردنی كه‌سێك بۆ پڕكردنه‌وه‌ی پۆستی سه‌رۆك وه‌زیران زۆر قورسه‌ ئه‌گه‌ر ئه‌سته‌م نه‌بێ، چونكه‌ دۆخی ئێستای عیراق له‌ كۆنترۆڵی لایه‌نه‌ سیاسییه‌كاندا ده‌رچووه‌ و جڵه‌و و كلیلی هێمنكردنه‌وه‌ و ئاساییكردنی كایه‌ سیاسییه‌كه‌ش به‌ده‌ستی شه‌قامی راپه‌ریوی به‌غدا و شاره‌كانی باشووره‌وه‌یه‌، دركاندنی ئه‌م حه‌قیقه‌ته‌ش به‌وه‌ی هێوركردنی دۆخه‌كه‌  كه‌ بریتییه‌ له‌رازییكردن وجێبه‌جبَكردنی خواست و ویستی خۆپیشانده‌ران، به‌ كه‌سێك ده‌كرێ كه‌ بێمنه‌ت بێ له‌ پۆست و پله‌و ده‌سه‌ڵات. چونكه‌ دوور رێگه‌ هه‌یه‌ بۆ رووبه‌رووبوونه‌وه‌ی پرسه‌كه‌ و كۆتایی هێنان به‌كێشه‌كان ،  یه‌كه‌میان  بریتییه‌ له‌ جێبه‌جێكردنی خواستی لایه‌نه‌ سیاسییه‌كان دووه‌میشیان بریتییه‌ له‌ جێبه‌جێكردنی خواستی خۆپیشانده‌ران، داواكاریی لایه‌نه‌سیاییه‌كان بۆ چارسه‌ركردنی كێشه‌كان هێنده‌ی ئاسمان و رێسمان له‌ داواكاریی خۆپیشانده‌ران جودایه‌ ، چونكه‌ خۆپیشانده‌ران به‌ تێكرا گه‌یشتونه‌ته‌وه‌ ئه‌و بروایه‌ی كه‌  ئه‌و نه‌هامه‌تیی و هه‌ژاریی و بێكاریی و نادادییه‌ی رووی تێكردوون به‌هۆی سیاسه‌تی چه‌وتی كاربه‌ده‌ستانی نێولایه‌نه‌ سیاسییه‌كانه‌ بۆیه‌ ئێستا به‌هیچ ده‌ستپێشخه‌ریی و چاره‌سه‌رێك قایل نابن كه‌له‌ هه‌گبه‌ی لایه‌نه‌سیاسییه‌كانه‌وه‌ ده‌رچێ، كاتێكیش له‌دۆخی وه‌هادا دكتۆر به‌رهه‌می سه‌رۆك كۆمار كاندیدی لیستی ته‌حالوفی بینای ره‌تكرده‌وه‌، خوێندنه‌وه‌ی دروستی بۆ قه‌باره‌ی كێشه‌كان كرد و چاكیش ده‌یزانی جێبه‌جێكردنی خواستی ئه‌و لایه‌نه‌ سیاسییه‌  جگه‌ له‌ ئاڵۆزتركردنی دۆخه‌كه‌ و رشتنی خوێنی زیاتری خۆپیشنده‌ران هیچی تر نییه‌ و درێژه‌دانه‌ به‌ قه‌یرانه‌كان چونكه‌ ئه‌و كاندیده‌ی كه‌ پۆستی سه‌رۆك وه‌زیران دیاری كراوه‌ پێشتر پارێزگاری به‌سره‌ بووه‌ و ژماره‌یه‌ك خۆپیشانده‌ریش له‌ پارێزگاكه‌ی ئه‌ودا كوژران و بریندار بوون  بۆیه‌ د. به‌رهه‌م  بوێرانه‌ داواكاریی شه‌قام و خۆپیشانده‌رنی جێبه‌جێكرد و رێگرییكرد له‌ رشتنی خوێنی زیاتری خۆپیشانده‌ران .

مه‌ریوان عه‌لی محه‌مه‌د

PUKmedia