لە ساڵی نوێدا دابەشکردنی مووچە دەستپێدەکات

.

لە سەرەتای مانگی یەكی ساڵی نوێدا دابەشكردنی مووچە دەستپێدەكات و پارەی پێویست بۆ دابەشكردنی مووچە لە داهاتی هەرێم بۆ  چەند وەزارەت و فەرمانگەیەك ئامادەیە.

لەوبارەوە سەرچاوەیەك لە وەزارەتی دارایی هەرێم  راگەیاند: پارەی پێویست بۆ دابەشكردنی مووچە لە داهاتی هەرێم بۆ  چەند وەزارەت و فەرمانگەیەك ئامادەیە و پارەكەی بەغداش لە لقی هەولێری بانكی ناوەندی ئامادەیە.

وتیشی بەپێی ئەو پلانەی دانراوە، لە رۆژانی یەكشەممە و دووشەممە 5 و 6ی كانوونی دووەمی 2020 دەستدەكرێت بە دابەشكردنی مووچەی مانگی 10ی 2019 و یەكەم وەزارەتیش كە مووچەی پێدەدرێت وەزارەتی پێشمەرگە دەبێت .

سەرچاوەكە ئاماژەی بەوەشكرد وەزیری دارایی لە كۆبوونەوەیەكدا باسی لەوە كردووە كە ئەو پارەیەی بەغدا كە مانگانە دەینێرێت بەردەوام دەبێت تا ئەو كاتەی رێككەوتنەكەی نێوان هەرێم و بەغدا لە بارەی پشكی كورد لە بودجەی گشتی عێراق دەچێتە بواری جێبەجێكردنەوە.

حكومەتی هەرێمی كوردستان مانگانە بە پارەی داهاتی ناوخۆ و سامانە سروشتییەكان كە بڕەكەی 317 ملیار دینارە و  پارەكەی بەغداش كە بڕەكەی 453 ملیار دینارە مووچەی فەرمانبەران دابەشدەكات.

PUKmedia ئاژانسەکان