بۆ یەكەم ساڵیادی كۆچی دوایی مستەفا ساڵح كەریم

.

ساڵێك بەسەر كۆچی دوایی مامۆستا مستەفا ساڵح كەریم-ی نووسەرو رووناكبیر و رۆژنامەنووسی بەتوانا و ناوداردا تێدەپەڕێت كە بۆخۆی خەسارەتێكی گەورە بوو و جێگەی پڕنابێتەوە. بەم بۆنە خەمناكەو لە یادی یەكەم ساڵڕۆژی كۆچی دوایی ئەو قەڵەمە بەبڕشت و ئەزمووندارەدا، وێڕای دووبارە سەرەخۆشیی خۆم لە خانەوادە و كەسوكاری مامۆستا، سەری رێز بۆ ئەو قەڵەمە نەوی دەكەم كە ساڵانێكی زۆر شەونخونیی بەدیار وشەی رەسەنی كوردییەوە كرد.

مامۆستا مستەفا، یادگاری و بیرەوەریی زۆری لای نووسەران و رۆشنبیرانی كورد هەیە و زۆرجار هاوكارو یارمەتیدەرێكی دڵسۆزی من بووە لە پیاچوونەوەو راستكردنەوەو دەوڵەمەندتركردنی بابەت و نووسینەكانمدا بۆیە خۆم بەقەرزباری دەزانم.

لەم یادەدا هەر ئەوەندەم بۆ دەكرێت كە بە ئاهی لەدەستدانی ئەو رووناكبیرەوە، بەم چەند دێڕە رێزو وەفاداریی خۆمی بۆ دەربڕم و سڵاو و رێزی تایبەتی بۆ بنێرم.

یادت زیندووە مامۆستا مستەفا ساڵح كەریم.

  گەلاوێژ