سه‌رۆك كۆمار: پێویسته‌ حكومه‌تی داهاتوو پشتیوانی جه‌ماوه‌ری هه‌بێت

.

سه‌رۆك كۆمار به‌رده‌وامه‌ له‌ راوێژ و گفتوگۆ چڕوپڕه‌كانی له‌گه‌ڵ سه‌ركرده‌ی پێكهاته‌ سیاسییه‌كان و چالاكییه‌ میللی و كۆمه‌ڵاتییه‌كان و بژارده‌ ئه‌كادیمی و سه‌ندیكا و یه‌كێتییه‌ پیشه‌ییه‌كان و توێژه‌ جیاوازه‌كانی تری كۆمه‌ڵ به‌ مه‌به‌ستی راسپاردنی كاندیدێك بۆ سه‌رۆكایه‌تیكردنی ئه‌نجومه‌نی وه‌زیران كه‌ پشتیوانی گه‌ل به‌ده‌ست بهێنێت.

د. به‌رهه‌م ساڵح سه‌رۆك كۆماری عیراق له‌میانی راوێژ و گفتوگۆ به‌رده‌وامه‌كانیدا ته‌ئكیدی كردوه‌ته‌وه‌ له‌سه‌ر پێویستی پشت به‌ستن به‌ بڕگه‌كانی ده‌ستوور و دواین واده‌ ده‌ستوورییه‌كان بۆ ئه‌وه‌ی زامنی ئه‌وه‌ بكرێت كه‌ سه‌رۆكایه‌تی حكومه‌تی نوێ ئه‌ركی قۆناغی راگوزه‌ر بگرێته‌ ئه‌ستۆ تا ئه‌وكاته‌ی هه‌ڵبژاردن به‌گوێره‌ی یاسایه‌كی هه‌ڵبژاردنی دادپه‌روه‌ر و سازكردنی له‌لایه‌ن كۆمسیۆنی هه‌ڵبژاردنی سه‌ربه‌خۆوه‌ به‌ ئاكام بگه‌یه‌نرێت.

بڕگه‌كانی ده‌ستوور به‌گوێره‌ی ماده‌ی 76ی ده‌ستوور، پێكهاته‌ سیاسییه‌ په‌یوه‌ندیداره‌كان له‌ په‌رله‌مان په‌یوه‌ست ده‌كات بۆ ئه‌وه‌ی پاڵێوراوی خۆیان پێشكه‌ش بكه‌ن و سه‌رۆك كۆماریش رایبسپێرێت.

سه‌رۆك كۆمار له‌میانی دیدار و گفتوگۆكانی ته‌ئكیدیكردوه‌ته‌وه‌ له‌سه‌ر پێویستی به‌رده‌وامیدانی گفتوگۆ و راوێژه‌كانی نێوان پێكهاته‌ سیاسییه‌كان له‌ پێناو گه‌یشتن به‌ رێككه‌وتنێك تا كه‌سێكی باوه‌ڕ پێكراوی گونجاو بۆ سه‌رۆكایه‌تی ئه‌نجومه‌نی وه‌زیران دیاری بكرێت، پێویسته‌ ئه‌و كاندیده‌ له‌گه‌ڵ پێودانگی داواكارییه‌كانی گه‌لی عێراق و داواكارییه‌ ره‌واكانیان بێته‌وه‌، هه‌روه‌ها حكومه‌تی نوێ‌ پشتیوانی سیاسی و جه‌ماوه‌ری پێویست به‌ ده‌ست بهێنێت بۆ ئه‌وه‌ی چاكسازییه‌ پێویسته‌كان بخاته‌ به‌رنامه‌ی پێشینه‌ی خۆی وه‌ك ده‌ست پێشخه‌رییه‌ك بۆ سازكردنی هه‌ڵبژاردنێكی پاك و بێگه‌رد.

سه‌رۆك كۆمار روونیكرده‌وه‌، ئاستی ئاڵه‌نگارییه‌كان مه‌ترسیدارن كه‌ وڵات رووبه‌ڕووی ده‌بێته‌وه‌، پێویسته‌ به‌رژه‌وه‌ندی لایه‌نێك و حزب له‌ به‌رچاو نه‌گیرێت و پشت ببه‌سترێت به‌ ره‌زامه‌ندی گه‌ل و پابه‌ندبوون و به‌دیهێنانی چاكسازییه‌كان و پێشكه‌شكردنی پێشینه‌ نیشتمانییه‌كان به‌سه‌ر به‌رژه‌وه‌ندییه‌ حزبییه‌كاندا.

PUKmedia نوسینگه‌ی راگه‌یاندنی سه‌رۆك كۆمار