قوباد تاڵه‌بانی: ئه‌م كۆنگره‌یه‌ وێستگه‌ی نوێكردنه‌وه‌ی یه‌كێتییه‌ له‌سه‌ر رێبازی چه‌پكه‌ گوڵه‌كه‌ی مام

.

دوای به‌ڕێوه‌چوونی كۆنفرانسی مه‌ڵبه‌نده‌كانی یه‌كێتیی نیشتمانیی كوردستان به‌شێوه‌یه‌كی سه‌ركه‌وتوو، قوباد تاڵه‌بانی، له‌ پێگه‌ی تایبه‌تی خۆی له‌ تۆڕی كۆمه‌ڵایه‌تی فه‌یسبووك ، په‌یامێكی پیرۆزبایی ئاڕاسته‌ی یه‌كێتییه‌كان كردووه‌و ئه‌م سه‌ركه‌وتنه‌شی به‌ وێستگه‌یه‌كی گرنگی سه‌ركه‌وتنی یه‌كێتی وه‌سفكردووه‌ بۆ نوێبوونه‌وه‌و سه‌ركه‌وتنی یه‌كێتی له‌سه‌ر رێبازی چه‌پكه‌ گوڵه‌كه‌ی مام، ئه‌مه‌ش ده‌قی په‌یامه‌كه‌یه‌:

به‌ڕێوه‌چوونی هه‌ڵبژاردنی مه‌ڵبه‌نده‌كان و پێشتریش كۆمیته‌ و مه‌كته‌به‌كان سه‌ركه‌وتنێكی گه‌وره‌یه‌ بۆ هه‌موو یه‌كێتی و بۆ هه‌موو ئه‌وانه‌ی دڵیان به‌ یه‌كێتییه‌وه‌ په‌یوه‌سته‌. ئه‌م ده‌سكه‌وته‌ له‌ هه‌موو هه‌ڤاڵان و جه‌ماوه‌ری یه‌كێتی پیرۆز بێت.

ئه‌م كۆنگره‌یه‌ وێستگه‌ی نوێكردنه‌وه‌ی یه‌كێتییه‌ له‌سه‌ر رێبازی چه‌پكه‌ گوڵه‌كه‌ی مام، كۆنگره‌ی رێكخستنه‌وه‌ی توانا و وزه‌كانی یه‌كێتییه‌، كۆنگره‌ی به‌هێزكردنی یه‌كێتیی ناو یه‌كێتییه‌. له‌ هه‌مووی گرنگتر كۆنگره‌ی ئاشته‌وایی و گێڕانه‌وه‌ی هیوایه‌ بۆ ئه‌وانه‌ی گله‌یی دۆستانه‌یان له‌ یه‌كێتی هه‌یه‌. یه‌كێتی پێویستیی به‌ هه‌موومانه‌ و با هه‌مووشمان به‌بێ جیاوازی تێبكۆشین بۆ سه‌ركه‌وتنی كۆنگره‌ی چواره‌م و ئه‌مه‌ش رێگایه‌كه‌ بۆ ئاسوده‌كردنی رۆحی شه‌هیده‌كان و روحی رابه‌ڕ و سه‌ركرده‌ی مه‌زنمان سه‌رۆك مام جه‌ڵال كه‌ هه‌موو ژیانی خۆی به‌ یه‌كێتی به‌خشی. وه‌ك مام فه‌رموویه‌تی سه‌روه‌ریمان، مانه‌وه‌مان و گه‌شه‌سه‌ندمان به‌نده‌ به‌ یه‌كێتیی نیشتمانیی كوردستانه‌وه.

ئیتر بۆ پێشه‌‌وه‌‌
به‌‌ره‌‌و كۆنگره‌‌ی چواره‌‌م
به‌‌ره‌و‌ نوێ بوونه‌‌وه‌

PUKmedia