خواردنەوەی شیر پێویستە؟

.

پسپۆڕێكی خۆراك رایدەگەیەنێت، شیر بەهای خۆراكی وەك جاران نەماوە و بە خێرایی رێژەی شەكر لەخوێندا بەرز دەەكاتەوە.

د. بینایی كامەران پسپۆڕی خۆراك رایدەگەیەنێت، پێكهاتەی شیر بە نزیكەیی بریتیە لە 78% ئاو، 5% لاكتۆز (شەكر) 3.4% چەوری، 3.3% پرۆتین، و تەنها 0.7% كانزای تێدایە،  واتە 1% كەمتر،  ئەمە لە كاتێكدا شیری مانگای سروشتی بێت و وشك نەكرابێتەوە و نەكرابێتە قوتو پاكەتەوە، بۆیە شیر بەهای خۆراكی وەك جاران نەماوە چونكە بەخێو كردنی ئاژەڵەكان وەك جاران تەندروست نییە، ئەمە راستییەكە و لە زۆربەی توێژینەوە نوێیەكان دەركەوتووە.

دەشڵێت،  چەوری ناو شیر بەسودە و یارمەتی هەرسی شیرەكە دەدات، شیری كەم چەوریش زیاتر شەكرەو ئازاری ریخۆڵە دەدات.

راشیدەگەیەنێت: شیر ناتوانێت ئێسكە نەرمەو ئازارو نەخۆشی ئێسك و جومگە باشتر بكات لە ئێستادا، لەگەل ئەوەی رێژەیەكی شەكری زۆری تێدایە (زۆر كەم كانزاو ڤیتامینی تیایە) ، وە بۆ قەڵەوی بەتایبەتی قەڵەوی ورگ و كەمەر خراپە قەڵەوی خۆشی هۆكارێكی ئازاری پشت و جومگەیە.

ئەو پسپۆڕەی خۆراك دەڵێت: خواردنەوەی شیر بۆ نەخۆشی شەكرە خراپە چونكە خێرا رێژەی شەكر لەخوێندا بەرز دەەكاتەوە و  بۆ كێشەی هەرس و كۆلۆن باش نییە بەهۆی بوونی شەكری لاكتۆز تێیدا.

ئاماژەی بۆ ئەوەشكرد: شیر لەدوای تەمەنی  دوو ساڵی تەمەن خواردنەوەی رۆژانەی پێویست و گرنگ نییە بۆ تەندروستی و لە هەندێ كەسدا زۆر خواردنەوەی رەنگە زیانی هەبێت بۆ تەندروستی بەتایبەتی كەسێك كەكێشی زۆر بێت.

PUKmedia راگەیاندنی بەڕێوەبەرایەتی گشتی تەندروستی سلێمانی