وه‌فدێكی زه‌حمه‌تكێشان سه‌ردانی یه‌كێتی ده‌كات

.

كۆسره‌ت ڕه‌سول عه‌لی ڕایگه‌یاند به‌ یه‌كڕیزی و یه‌كده‌نگی نێوان لایه‌نه‌ سیاسییه‌كان ده‌توانرێ مافه‌ ده‌ستووری و یاساییه‌كانی كورد به‌ده‌ست بهێنرێ.

ئه‌م وتانه‌ی جێگری سكرتێری گشتی یه‌كێتی نیشتمانی كوردستان ئه‌مڕۆ چوارشه‌ممه‌ ٢٠/١١/٢٠١٩ له‌میانی پێشوازیكردنی له‌ (به‌همه‌ن حسێن، به‌ڵێن عه‌بدوڵا و سه‌عد خالید) ئه‌ندامانی ده‌سته‌ی سه‌رۆكایه‌تی حزبی زه‌حمه‌تكێشانی كوردستان و بێكه‌س قادر ئه‌ندامی مه‌كته‌بی سیاسی.

له‌ دیداره‌كه‌دا كه‌ هه‌ریه‌ك له‌ حاكم قادر حه‌مه‌جان و عیماد ئه‌حمه‌د ئه‌ندامانی مه‌كته‌بی سیاسی ئاماده‌ی بوون، گفتوگۆكرا له‌باره‌ی په‌یوه‌ندییه‌كانی نێوان هه‌ردوولاو په‌ره‌پێدانی زیاتری په‌یوه‌ندییه‌كان به‌ئاراسته‌ی پته‌وكردن و گه‌شه‌سه‌ندنی زیاتر.

دۆخی كوردستان و عێراق ته‌وه‌رێكی تری دیداری نێوان وه‌فدی یه‌كێتی نیشتمانی كوردستان و حزبی زه‌حمه‌تكێشانی كوردستان بوو، هه‌ردوولا پشتیوانی خۆیان بۆ چاكسازی و جێبه‌جێكردنی داوا ڕه‌واكانی خۆپیشانده‌ران ده‌ربڕی و هه‌موو جۆره‌ توندوتیژییه‌كیان ڕه‌تكرده‌وه‌و دووپاتیان كرده‌وه‌ كه‌ پێویسته‌ چاكسازی ڕیشه‌یی ئه‌نجام بدرێت و خزمه‌تگوزاری زیاتر پێشكه‌شی هاووڵاتیان بكرێت.

هه‌روه‌ك هه‌ردوولا جه‌ختیان له‌وه‌ كرده‌وه‌ كه‌ به‌هیچ شێوه‌یه‌ك نابێ ده‌ستكاری مافه‌ یاسایی و دیموكراسی و ده‌ستوورییه‌كانی كورد بكرێ و له‌ژێر هیچ بیانوویه‌ك ئه‌مه‌ قبوڵكراو نییه‌.

بۆ ئه‌م مه‌به‌سته‌ كۆسره‌ت ڕه‌سول عه‌لی گوتی: یه‌كێتی نیشتمانی كوردستان خه‌باتی كردووه‌و خه‌بات ده‌كا له‌پێناو عێراقێكی دیموكراتی فیدڕاڵ كه‌ تێیدا مافه‌ ده‌ستووری و یاساییه‌كانی كوردو سه‌رجه‌م پێكهاته‌و نه‌ته‌وه‌ جیاوازه‌كان پارێزراو بێ.

په‌یوه‌ندی نێوان لایه‌نه‌ سیاسییه‌ كوردستانییه‌كان و كاریگه‌ری له‌سه‌ر جێبه‌جێكردنی داخوازییه‌ ڕه‌واكانی كوردو پێشخستنی پرسی كورد له‌ ناوچه‌كه‌ ته‌وه‌رێكی تری كۆبوونه‌وه‌كه‌ بوو، هه‌ردوولا هاوڕابوون كه‌ ده‌بێ سه‌رجه‌م لایه‌نه‌ كوردستانییه‌كان كاربكه‌ن بۆ یه‌كهه‌ڵوێستی نێوانیان و خه‌بات كردن له‌پێناو به‌ده‌ستهێنانی مافه‌ ڕه‌واكانی كورد.

PUKmedia ڕاگه‌یاندنی جێگری سكرتێری گشتی