ئەنجامی تاقیكردنەوەی خولەكانی توانستی زمانی ئینگلیزی رادەگەیەنرێت

.

وەزارەتی خوێندنی باڵاو توێژینەوەی زانستی ئەنجامی تاقیكردنەوەی خولەكانی توانستی زمانی ئینگلیزی لە زانكۆكانی هەرێمی كوردستان بۆ كاندیدان و خوازیارانی بەدەستهێنانی نازناوی زانستی رادەگەیەنێت.

د.محەمەد حسێن سەرۆكی لێژنەی تایبەت بە پێداچوونەوە بە مەرج و رێنماییەكانی زمانی ئینگلیزی و رێكخستنەوەی كارو چالاكیەكانی سەنتەرەكانی زمان لە وەزارەتی خوێندنی باڵا و توێژینەوەی زانستی راگەیاند: سبەی سێشەممە 19ی تشرینی دووەمی 2019، ئەنجامی تاقیكردنەوەكانی خولەكانی توانستی زمانی ئینگلیزی لە سەنتەرەكانی زمانی  زانكۆكانی هەرێمی كوردستان بۆ كاندیدان و خوازیارانی بەدەستهێنانی نازناوی زانستی لەلایەن سەنتەرەكانەوە رادەگەیەنرێت، كە لەڕێكەوتی (9 تا 14)ی ئەم مانگە تاقیكردنەوەی بەشداربوان بۆ سەرجەم ئاستەكان بەڕێوەچو بوو.

سەرۆكی لیژنەی تایبەت بە پێداچوونەوە بە مەرج و رێنماییەكانی زمانی ئینگلیزی و رێكخستنەوەی كارو چالاكیەكانی سەنتەرەكانی زمان جەخت لەسەر ئەوەدەكاتەوە، كە كاندیدان و خوازیاران دەتوانن سەردانی سەنتەرەكان یان وێب سایتی سەنتەرەكانی زمان و وێب سایتی زانكۆكان بكەن بۆ وەرگرتنەوەی ئەنجامەكانیان. هەروەك وتیشی لە دوای دەرچونی ئەنجامەكان بۆ ماوەی 48 سەعات كاندیدان و خوازیاران دەرفەتیان لە پێشە بۆ پەڵپگرتن لە ئەنجامەكانیان تاكو كۆتایی دەوامی رەسمی رۆژی پێنجشەممە 21ی ترشینی دووەمی 2019.

د.محەمەد حسێن راشیگەیاند: لەداهاتویەكی نزیكدا خولی نوێی ئاستەكانی توانستی زمانی ئینگلیزی بەسیستمێكی تازە لەسەرجەم سەنتەرەكانی زمانی زانكۆكان دەستپێدەكاتەوە.

PUKmedia راگەیاندنی خوێندنی باڵا