ئێران.. گرانكردنی نرخی سوتەمەنی پشێوی لێدەكەوێتەوە

.

بڕیاری گرانكردنی نرخی بەنزین لە تارانی پایتەخت و چەندین شاری تری ئێران ناڕەزایی توندی لێكەوتەوە. 

خۆپیشاندان بۆ ناڕەزایی دەربرین بەرامبەر بەو بڕیارە شارەكانی ئەهواز و مەشهەد و سیرجان و گەچساران و عەبادان و خوڕەمشەهی گرتووەتەوە و لە شاری سیرجانی سەر بە پارێزگای كرمانی باشوری ئێران خۆپیشاندەران هەوڵیان داوە ئەنبارێكی نەوت بسوتێنن بەڵام هێزە ئەمنییەكان رێگریان لێكردوون و خۆپیشاندەرێكیش كوژراوە.

ئێران نرخی بەنزینی بە ڕێژەی لەسەدا 300 زیاد كردووە، كۆمپانیای نیشتیمانی نەوتی ئێران لە راگەیەنراوێكیدا لەوبارەیەوە ئاماژەی بەوەكردووە پشكی هەر شۆفێرێك مانگانە 60 لیتر دەبێت و نرخی ئەو بڕە بەنزینەش بە ڕێژەی لەسەدا 50 بەرز دەبێتەوە، بەڵام لە سەر و ئەو بڕەوە نرخەكەی بۆ لەسەدا 300 بەرز دەبێتەوە.

 محەمەد باقر نەوبەخت سەرۆكی دەزگای پلاندانان و بودجەی ئێران لەو بارەیەوە رایگەیاندووە: بڕیاری زیادكردنی نرخی بەنزین بەرەزامەندی ئەنجومەنی باڵای هاوئاهەنگیی ئابوری دراوە كە لە هەر سێ‌ سەرۆكایەتییەكە پێكهاتووە.

PUKmedia كوردسات نیوز