ئەمڕۆ چوارشەممە 13-11-2019 لەشاری سلێمانی، كۆسرەت رەسوڵ عەلی جێگری سكرتێری گشتی یەكێتیی نیشتمانیی كوردستان پێشوازی كرد لە ڤینیسینت پۆپیۆو بەرپرسی نووسینگەی یەكێتی ئەوروپا لە هەرێمی كوردستان.

لە دیدارەكەدا كە سەعدی ئەحمەد پیرە ئەندامی مەكتەبی سیاسی یەكێتی ئامادەی بوو، گفتوگۆكرا لەبارەی دۆخی كوردستان و عیراق وپرسەكانی پەیوەست بە گۆڕانكارییە پێشبینیكراوەكان.

تایبەت بەدۆخی كوردستان، كۆسرەت رەسوڵ رایگەیاند: یەكێتی لەگەڵ یەكهەڵوێستی لایەنە سیاسییەكانە و هەوڵی جدی دەدات تا سەرجەم هێزە كوردستانییەكان خاوەن دیدێكی هاوبەش بن بۆ پرسەكانی پەیوەست بە دۆخی كوردستان.

سەبارەت بەدۆخی بەغداو خۆپیشاندانەكان، جێگری سكرتێری گشتی پشتیوانی خۆی بۆ داوا ڕەواكانی خۆپیشاندەران دەربڕی و ئاماژەیبەوەدا كە پشتیوانی لەهەموو هەوڵێكی چاكسازی و بەرەنگاربوونەوەی گەندەڵی دەكەن و سەبارەت بەپرسی هەمواری دەستووریش ڕایگەیاندكە نابێ مافە دەستووری و یاساییەكانی كورد دەستكاری بكرێ و دەبێ دەستوور ڕەنگدانەوەی واقیعی نەتەوەو ئایین و پێكهاتەجیاوازەكانی عێراق بێ.

بەشێكی تری دیدارەكە تەرخانكرا بۆ دۆخی ناوخۆی یەكێتی و پرسی بەستنی كۆنگرەی یەكێتی، لەمڕووەوە كۆسرەت ڕەسول بەوردی باسیلەهەنگاوەكانی بەستنی كۆنگرەو هەوڵەكانی یەكێتی بۆ حوكمڕانییەكی تەندروست و خزمەتگوزار خستەڕوو.

پەیوەندییەكانی نێوان هەرێمی كوردستان و یەكێتی ئەوروپا تەوەرێكی تری دیدارەكە بوو، كۆسرەت رەسوڵ داوای لە بەرپرسی نووسینگەییەكێتی ئەوروپا كرد كە هەوڵبدەن پەرە بە پەیوەندییەكان بدەن و لەسێكتەرە جیاوازەكان خزمەتی هەرێمی كوردستان بكەن.

PUKmedia تایبەت